Վենետիկյան հանձնաժողովը Թուրքիային կոչ է արել հետաձգել սահմանադրական փոփոխությունների հանրաքվեն

Միջազգային08:15, 02 Մարտ 2017

Վենետիկյան հանձնաժողովը Թուրքիային կոչ է արել հետաձգել սահմանադրական փոփոխությունների հանրաքվեն

Եվրոպայի խորհրդի (ԵԽ) սահմանդարական փոփոխությունների ուսումնասիրման Վենետիկյան հանձնաժողովը զեկույց է պատրաստել Թուրքիայում նախատեսվող սահմանադրական փոփոխությունների վերաբերյալ:

Ըստ թուրքական «Demokrathaber.net» լրատվական կայքի` զեկույցի նախագծում կառավարման նախագահական համակարգին անցումը նախատեսող սահմանադրական փոփոխությունները որակվում են որպես «վտանգավոր հետքայլ Թուրքիայի սահմանադրական ժողովրդավարության տեսանկյունից»: Հանձնաժողովի եզրակացության մեջ նշվում է, որ նախատեսվող նոր համակարգը ավտորիտար ու մեկ անձի կառավարման համակարգի վերածվելու վտանգ է պարունակում:

Զեկույցում անթույլատրելի է համարվում նաև հեղաշրջման փորձից հետո հայտարարված և երկրում մինչ այժմ շարունակվող արտակարգ դրության պայմաններում հանրաքվեի անցկացումը:

«Հանրաքվեն պետք է անցկացնել կամ արտակարգ դրության ժամկետի ավարտից հետո, կամ էլ պետք է հանել քաղաքական ազատությունների վրա դրված սահմանափակումները»,- ասված է Վենետիկ ահանձնաժողովի զեկույցի նախագծում:

Նշենք, որ Թուրքիայում հաստատված է կառավարման խորհրդարանական համակարգ, որից նախագահական համակարգին անցնելու համար անհրաժեշտ է սահմանադրական փոփոխություններ իրականացնել: Սահմանադրական փոփոխությունների հանրաքվեն նախատեսված է անցկացնել ապրիլի 16-ին:

Կառավարման համակարգի փոփոխմամբ կընդլայնվեն ներկայիս նախագահ Ռեջեփ Թայիփ Էրդողանի լիազորությունները, կվերացվի վարչապետի պաշտոնը, ինչպես նաև կներդրվի փոխնախագահի ինստիտուտը:

Աղբյուր` Ermenihaber.am