Կրկին Հոլանդիա այցելելու դեպքում թուրք նախարարին ազատազրկում է սպառնում

Միջազգային12:34, 13 Մարտ 2017

Կրկին Հոլանդիա այցելելու դեպքում թուրք նախարարին ազատազրկում է սպառնում

Թուրքիայի ընտանիքի և սոցիալական քաղաքականության հարցերով նախարար Ֆաթմա Բեթյուլ Սայան Քայան առաջիկա 10 տարվա ընթացքում իրավունք չի ունենա այցելել Շենգենյան գոտու երկրներ: Այս մասին տեղեկացնում է թուրքական «Haberdar» լրատվակայքը՝ «BBC Türkçe»-ին հղումով:

Իսկ եթե նշված ժամանակահատվածում Քայան կրկին փորձ անի այցելել Հոլանդիա, ապա կարող է դատապարտվել 6 ամսվա ազատազրկման կամ կրկին արտաքսվել երկրից:

«BBC»-ի թղթակից Յուսուֆ Օզքանի հոդվածում նշվում է, որ թուրք նախարար Քայայի՝ որպես «անցանկալի անձ» Հոլանդիայից արտաքսումը գնահատվում է որպես ՆԱՏՕ-ի գործընկեր երկրի դեմ կայացված բավական խիստ վճիռ: «Անցանկալի անձ» հայտարարվելու պատճառով Ֆաթմա Քայան չի կարողանա մուտք գործել նաև Շենգենյան մյուս երկրներ:

Մինչ օրս Հոլանդիան այս միջոցը կիրառել է միայն իրավական առումով երկրում գտնվելու իրավունք չունեցող և անվտանգության առումով սպառնալիք ներկայացնող օտարազգի օրինախախտների դեմ:

Աղբյուր` Ermenihaber.am