Ռյուտեն՝ Թուրքիայի որոշման մասին. «Նոր պատժամիջոցները այնքան էլ վատը չեն»

Միջազգային09:46, 14 Մարտ 2017

Ռյուտեն՝ Թուրքիայի որոշման մասին. «Նոր պատժամիջոցները այնքան էլ վատը չեն»

Նիդերլանդների վարչապետ Մարկ Ռյուտեն արձագանքել է Թուրքիայի կառավարության կողմից հոլանդիայի դեմ սահմանված պատժամիջոցներին: Ռյուտեն մասնավորապես նշել է, որ իրականում իր երկիրն ավելի շատ բարկանալու պատճառներ ունի և տարօրինակ է, որ նման պայմաններում Թուրքիան է Հոլանդիայի դեմ պատժամիջոցներ սահմանում:

Թուրքական «Haberler» լրատվակայքի փոխանցմամբ՝ երեկ Թուրքիայի կառավարության նիստի ժամանակ հաստատված պատժամիջոցները, Հոլանդիայի վարչապետի կարծիքով, «այնքան էլ վատը չեն»:

Նշենք, որ թուրք - հոլանդական ճգնաժամի ֆոնին Նիդերլանդների դեմ Թուրքիայի կառավարության կողմից սահմանված պատժամիջոցները հրապարակվել էին երեկ՝ կառավարության խոսնակ Նուման Քուրթուլմուշի կողմից:

Դրանք են.
1. Թուրքիան թույլ չի տա երկիր մուտք գործել Նիդերլանդների դեսպանին, ով այս պահին արձակուրդում է և գտնվում է Թուրքիայի սահմաններից դուրս: Նրա վերադարձը կարգելվի այնքան ժամանակ, քանի դեռ Հոլանդիան չի կատարել Թուրքիայի պահանջները:

2. Երկու երկրների միջև կդադարեցվեն բարձրաստիճան դիվանագիտական հարաբերությունները՝ այնքան ժամանակ, մինչև Հոլանդիան փոխհատուցի իր արարքի համար:

3. Պաշտոնական այցով Թուրքիա ժամանել պատրաստվող հոլանդացի դիվանագետների այցը կարգելվի: Թուրքիան կարգելի դիվանագիտական թռիչքները այնքան ժամանակ, մինչև Հոլանդիան փոխհատուցի իր արարքի համար:

4. Թուրքիայի ազգային մեծ ժողովին (ԹԱՄԺ-TBMM) կառաջարկվի լուծարել ԹԱՄԺ-ի և Հոլանդիայի խորհրդարանի միջև բարեկամության խմբի թուրքական մասը: