Քրդերը Բելգիայում կոչ են անում դեմ քվեարկել Թուրքիայի սահմանադրական փոփոխություններին

Միջազգային07:49, 21 Մարտ 2017

Քրդերը Բելգիայում կոչ են անում դեմ քվեարկել Թուրքիայի սահմանադրական փոփոխություններին

Բրյուսելում քրդերը Նովրուզի տոնի կապակցությամբ միտինգ են անցկացրել, որտեղ կոչ են արել դեմ քվեարկել Թուրքիայի սահմանադրական փոփոխություններին:

Ըստ թուրքական «Haberler.com» լրատվական կայքի` հավաքի մասնակիցները հիմնականում եղել են Թուրքիայում ահաբեկչական համարվող «Քուրդիստանի բանվորական կուսակցության» (PKK-ՔԲԿ) համակիրները:

Նովրուզի կապակցությամբ նմանատիպ հանրահավաք է անցկացվել նաև Հոլանդիայի Հաագա քաղաքում, որտեղ նույնպես կոչ է արվել «ոչ» ասել Թուրքիայում ապրիլի 16-ին սպասվող սահմանադրական փոփոխությունների հանրաքվեին: Նշվում է, որ հավաքին մասնակցել է մոտ 200 քուրդ: Նրանք քրդերի առաջնորդ ու PKK-ի հիմնադիր Աբդուլլահ Օջալանի նկարներով պաստառների ուղեկցությամբ երթ են անցկացրել Հաագայի փողոցներով:

Մարտի 18-ին էլ քրդերը ցույց էին անցկացրել Թուրքիայի հետ լարված հարաբերություններ ունեցող մեկ այլ եվրոպական երկրում` Գերմանիայում:

Հիշեցնենք, որ Թուրքիայի հարաբերությունները եվրոպական մի շարք երկրների հետ լարվեցին այն բանից հետո, երբ այդ երկրները արգելեցին թուրք քաղաքական գործիչներին իրենց տարածքում ապրող թուրքերի շրջանում քարոզարշավ անցկացնել: Մինչ այժմ թուրք քաղաքական գործիչների քարոզչական այցերը արգելել են Գերմանիան, Ավստրիան, Բելգիան, Դանիան, Հոլանդիան, Շվեյցարիան:

Աղբյուր` Ermenihaber.am