Օհայոյի «Թուրք-ամերիկյան միությունը» Թուրքիայի դեմ բողոք կներկայացնեի ԱՄՆ կառավարությանը

Միջազգային10:52, 09 Մայիս 2017

Օհայոյի «Թուրք-ամերիկյան միությունը» Թուրքիայի դեմ բողոք կներկայացնեի ԱՄՆ կառավարությանը

ԱՄՆ-ի Օհայո նահանգի Դայթոն քաղաքում գործող «Թուրք-ամերիկյան միությունը» պատրաստվում է Թուրքիայի դեմ բողոք ներկայացնել ԱՄՆ կառավարությանը: Այս մասին տեղեկացնում է թուրքական իշխանամետ «Sabah» թերթի կայքը:

Միությունը էլեկտրոնային նամակներ է ուղարկել ողջ նահանգում գտնվող իր անդամներին՝ կոչ անելով նամակներ հղել ԱՄՆ կոնգրեսականներին և իրենց բողոքն արտահայտել Թուրքիայի դեմ:

Ըստ աղբյուրի՝ նամակում մասնավորապես մտահոգություն է արտահայտվել Թուրքիայի նախագահ Ռեջեփ Թայիփ Էրդողանի՝ ԱՄՆ կատարելիք այցի և նախագահ Դոնալդ Թրամփի հետ կայանալիք հանդիպման վերաբերյալ: Նշվել է, որ ապրիլի 16-ի սահմանադրական փոփոխությունների հանրաքվեից հետո Թուրքիայում իրավիճակն ավելի է վատացել, ինչի մասին պետք է զգուշացնել Թրամփի կառավարությանը:

Նամակում ուշադրություն է հրավիրվել այն հանգամանքի վրա, որ Թուրքիան, որտեղ իշխում է իսլամամետ ավտորիտար ռեժիմը, չի վարանում ռմբակոծել քրդերին: Մինչդեռ վերջիններս Սիրիայում ԱՄն-ի լավագույն դաշնակիցներն են և պայքարում են «Իսլամական պետության» (ԻՊ- IŞİD) դեմ:

Նշենք նաև, որ թուրքական թերթի պնդմամբ, վերոհիշյալ նամակի և կոչի ետևում իրականում կանգնած է «Գյուլենական համայնքը» (FETÖ), որին, ըստ աղբյուրի, հարում է «Թուրք-ամերիկյան միությունը»:

Աղբյուր` Ermenihaber.am