Թուրքիան սկսել է Կատարին սննդամթերք մատակարարել նաև ծովային ճանապարհով

Միջազգային13:40, 20 Հունիս 2017

Թուրքիան սկսել է Կատարին սննդամթերք մատակարարել նաև ծովային ճանապարհով

Թուրքիայի Էկոնոմիկայի նախարար Նիհաթ Զեյբեքչին հայտարարել է, որ բացի օդային ճանապարհից, Թուրքիան արդեն սկսել է Կատարին սննդամթեք առաքել նաև ծովային ճանապարհով:

Ըստ թուրքական «Milliyet» թերթի կայքի՝ Զեյբեքչին տեղեկացրել է, որ Սաուդյան Արաբիայի գլխավորությամբ տարածաշրջանի 1 տասնայակից ավել երկրների՝ Դոհայի հետ հարաբերությունները խզելուց մինչ այս պահը Թուրքիան 90 ինքնաթիռ սնունդ է մատակարարել Կատարին:

Թուրքիայի գործարարների ու արդյունաբերողների միության ներկայացուցիչների հետ հանդիպման ժամանակ ունեցած ելույթում Զեյբեքչին մասնավորապես ասել է.

«Մեզանից հիմնականում կաթնամթերք ու հավկիթ են ուզել: Արդեն 90 ինքնաթիռ ուղարկել ենք: Բոլոր պահանջները բավարարել ենք: 4 հազար տոննա բեռով մեկ նավ արդեն ճանապարհին է: Ավելի ուշ 11 հզ տոննա տարողությամբ ևս մեկ բեռնատար նավ կմեկնի Կատար: Հիմա էլ սկսել ենք բառնատարներով առաքումը: Այն ժամանակ, երբ բոլորը տատանվում էին, մենք այնտեղ էինք: Սրանից հետո էլ ենք այնտեղ ներկա լինելու: Մեր այնտեղ լինելն արդեն անհրաժեշտություն է»:

Հիշեցնենք, որ հունիսի 5-ին Սաուդյան Արաբիայի գլխավորությամբ մի շարք արաբական երկրներ և Մալդիվները հայտարարեցին Կատարի հետ հարաբերությունները խզելու մասին: Իսկ Կատարի հետ ցամաքային սահման ունեցող միակ երկիրը հանդիսացող Սաուդյան Արաբիան դադարեցրեց ցամաքային և օդային հաղորդակցությունը Կատարի հետ:

Աղբյուր` Ermenihaber.am