Ֆրանսիայում քրդերը բողոքում են Թուրքիայի կողմից Աֆրինում իրականացվող կոտորածի դեմ

Միջազգային08:48, 21 Մարտ 2018

Ֆրանսիայում քրդերը բողոքում են Թուրքիայի կողմից Աֆրինում իրականացվող կոտորածի դեմ

Ֆրանսիայում քրդական կազմակերպությունները Unicef-ի շենքի դիմաց բողոքի ակցիա են կազմակերպել՝ հանուն Աֆրինի երեխաների: Ֆրանսիայի «Ժողովրդավարական քրդական խորհուրդի», «Քուրդ կանանց շարժման» կոչին ընդառաջ քուրդ ընտանիքներն Աֆրինում երեխաների կոտորածների վրա ուշադրություն հրավիրելու համար որոշել են մեկ օրով բոյկոտել դասերը:

Այդ ընտանիքներն իրենց երեխաների հետ հավաքվել են Փարիզում Unicef-ի շենքի դիմաց: Քուրդ երեխաները պարզել են «Ձեր լռությունը սպանում է մեզ» գրությամբ պաստառներ: Բողոքի ակցիան շարունակվել է «Բոլորս աֆրինցի երեխաներ ենք» և «Էրդողան՝ մարդասպան» կարգախոսների ներքո:

Ակցիայի մասնակիցները Unicef-ի ներկայացուցիչներին հանձնել են թղթապանակ, որում ներկայացվում է, թե ինչպես է Թուրքիան երեխաների կոտորած իրականացրել Աֆրինում:

Նշվում է, որ դասերը բոյկոտելու միջոցով բողոքի ձայն բարձրացնելու կոչին բացի Փարիզից միացել են նաև այլ քաղաքներում բնակվող քրդերը:

Աղբյուր` ANFNEWS