Թուրքիային բարկացրել է քուրդ գործչի ներկայությունը ԵԽԽՎ-ի վեհաժողովին

Միջազգային12:58, 24 Ապրիլ 2018

Թուրքիային բարկացրել է քուրդ գործչի ներկայությունը ԵԽԽՎ-ի վեհաժողովին

Եվրոպայի խորհրդի խորհրդարանական վեհաժողովի (ԵԽԽՎ) Թուրքիայի պատվիրակության ղեկավար Աքիֆ Չաղաթայ Քըլըչը դատապարտել է Սիրիայի քրդական «Ժողովրդավարական միություն կուսակցության» (ԺՄԿ-PYD) նախկին համանախագահ Սալիհ Մուսլիմի ներկայությունը վեհաժողովի ապրիլյան նիստին։

Քըլըչը ԵԽԽՎ-ին հղած նամակում պնդել է, որ Մուսլիմի նման անձի ներկայությունը վեհաժողովում «չի համապատասխանում» եվրոպական արժեքներին։ Ի նշան բողոքի՝ թուրքական պատվիրակության մեծ մասը վերադառնալու է Թուրքիա, իսկ մի մասը մնալու է Ստրասբուրգում, քանի որ վեհաժողովի ժամանակ քննարկվելու են Թուրքիայի հետ կապված մի շարք հարցեր։

Թուրքական պատվիրակության մեջ ընդգրկված են եղել նաև Թուրքիայի ընդդիմադիր քրդամետ «Ժողովուրդների դեմոկրատական կուսակցության» (ԺԴԿ-HDP) մի շարք պատգամավորներ։

Հիշեցնենք, որ փետրվարի 13-ին Թուրքիան Սալիհ Մուսլիմին ընդգրկել էր հետախուզման մեջ գտնվող «ահաբեկիչների» կարմիր ցուցակում»: Թուրքիայի ղեկավարությունը 4մլն թուրքական լիրա (մոտ 1մլն դոլար) էր խոստացել քուրդ քաղաքական գործչին ձերբակալելու և Անկարային արտահանձնելու դիմաց: