Թուրքական մամուլ. ԱՄՆ-ի կողմից Թուրքիային զենքի վաճառքի դադարեցման առաջարկի հեղինակը Գյուլենական համայնքն է

Միջազգային11:10, 14 Մայիս 2018

Թուրքական մամուլ. ԱՄՆ-ի կողմից Թուրքիային զենքի վաճառքի դադարեցման առաջարկի հեղինակը Գյուլենական համայնքն է

ԱՄՆ-ի կողմից Թուրքիային զենքի վաճառքի դադարեցման առաջարկով Ներկայացուցիչների պալատ ներկայացված նախագծի հեղինակը Թուրքիայում ահաբեկչական խմբավորում համարվող Գյուլենական համայնքն է (FETÖ)։ Այդպես են պնդում թուրքական էլեկտրոնային լրատվամիջոցները։

Ինչպես հայտնի է՝ ԱՄՆ ներկայացուցիչների պալատի՝ զինված ուժերի հարցով կոմիտեի նախապատրաստած «2019թ․ Ազգային պաշտպանության թույլտվության մասին ակտ»-ում նախատեսվում է ժամանակավորապես դադարեցնել Թուրքիային զենքի վաճառքը։ Թուրքական «takvim.com.tr» լրատվակայքի պնդմամբ՝ այդ նախագծի տակ ստորագրած սենատորների թվում կան մարդիկ, ովքեր ֆինանսավորվում են FETÖ-ի կողմից և մասնակցել են կառույցի մի շարք միջոցառումների։

Մասնավորապես, աղբյուրը հրապարակել է նշյալ կոմիտեի 62 անդամներից 10-ի անունները, ովքեր մեղադրվում են FETÖ-ի ֆինանսական աջակցությունից օգտվելու, ԱՄՆ-ում և Թուրքիայում կազմակերպության կողմից անցկացվող ժողովներին ու այցերին մասնակցելու մեջ։

«Մարկ Վեյսեյ․ 2012թ․ ԱՄՆ-ում FETÖ-ի հետ կապված ամենամեծ դպրոցի «Harmony Schools» -ի 6 տարբեր առաջնորդների կողմից Վեյսեյին 6․000 դոլար է տրամադրվել։

Վալտեր Ջոնս․ մասնակցել է FETÖ-ի կողմից կազմակերպված Թուրքիա այցին, ինչի համար 3․400 դոլար է ստացել։

Ռոբերտ Բրեդի․ մասնակցել է FETÖ-ի հետ կապված Թուրք –ամերիկյան միության 2014թ․ նիստին։

Սյուզան Դևիս․ 2008թ․ FETÖ-ի կողմից գործուղվել է Թուրքիա, ինչի համար ստացել է 3․020 դոլար։

Մայք Ռոջերս․ 2008թ․ FETÖ-ի կողմից գործուղվել է Թուրքիա, ինչի համար ստացել է 3․020 դոլար։

Քեննեթ Կոնավեյ․ FETÖ-ի հետ կապված Համաշխարհային խաղաղության և միջկրոնական երկխոսության ինստիտուտի կողմից 2009թ․ երկու անգամ գործուղվել է Թուրքիա, 2010թ․ կազմակերպության հետ կապված «Cormes» հիմնադրամի ֆինանսավորում է ստացել։

Մայք Քոֆման․ FETÖ-ի հետ կապված Փասիֆիք ինստիտուտի կողմից 2011թ․ գործուղվել է Թուրքիա, ինչի համար 2․452 դոլար ֆինանսավորում է ստացվել։

Ջիմ Բրիդենստիմ․ 2013թ․ մասնակցել է Բաքվում անցկացված «ԱՄՆ-Ադրբեջան կոնվենցիայի» խորագրով համաժողովին։ Այն կամզակերպվել էր FETÖ-ի հետ կապված Թուրք-ամերիկյան միությունը։

Մո Բրուքս․ 2013թ․ մասնակցել է FETÖ-ի կողմից կազմակերպված Թուրք-ամերիկյան միության տարեկան նիստին։

Պոլ Քուք․ 2012թ․ Քուքը FETÖ-ական գործարարների կողմից 1․200 դոլար ֆինանսական աջակցություն է ստացել»։