Ավստրիայի վարչապետ․ Թուրքիա-ԵՄ բանակցությունները պիտի լիովին դադարեցվեն

Միջազգային09:23, 29 Մայիս 2018

Ավստրիայի վարչապետ․ Թուրքիա-ԵՄ բանակցությունները պիտի լիովին դադարեցվեն

Ավստրիայի վարչապետ Սեբաստիան Քուրցը կրկին դեմ է արտահայտվել Թուրքիայի անդամակցությանը Եվրամիությանը։ Բրիտանական «Financial Times» պարբերականի հետ զրույցում Քուրցը տեսակետ է հայտնել, որ Եվրամիությունը պետք է դադարեցնի Թուրքիայի հետ բանակցային գործընթացը։

Նա նշել է, որ Թուրքիայի վիճակն անբարենպաստ է, և Անկարան ժողովրդավարության առումով չի համապատասխանում կոպենհագենյան չափանիշներին։ Ավստրիայի վարչապետն ընդգծել է, որ իրենք չեն վստահում Թուրքիային և կարծում են, որ այդ երկրի հետ բանակցությունները պետք է լիովին դադարեցվեն։ Նախկինում Քուրցը բազմիցս դեմ է արտահայտվել Թուրքիայի եվրաանդամակցությանը։

Թուրքական «Ensonhaber» լրատվակայքը Ավստրիայի վարչապետի հայտարարությունը բնութագրել է որպես «նենգություն»՝ հիշեցնելով, որ Ավստրիայում արգելվել են Թուրքիայի իշխող «Արդարություն և զարգացում» կուսակցության (ԱԶԿ-AKP) հանրահավաքները։

Թուրքական լրատվամիջոցի պնդմամբ՝ Ավստրիայի և մյուս եվրոպական երկրների նմանատիպ դիրքորոշումը պայմանավորված է նրանց ցանկությամբ՝ խանգարելու նախագահ Էրդողանին վերընտրվելու հարցում։

Աղբյուր` Ensonhaber