Էրդողանի խոսնակ. «Ավստրիայի դիրքորոշումը հակասում է միջազգային իրավունքի նորմերին»

Միջազգային11:42, 08 Հունիս 2018

Էրդողանի խոսնակ. «Ավստրիայի դիրքորոշումը հակասում է միջազգային իրավունքի նորմերին»

Թուրքիայի նախագահ Ռեջեփ Թայիփ Էրդողանի խոսնակ Իբրահիմ Քալընն անդրադարձել է Ավստրիայի իշխանությունների՝ 7 մզկիթ փակելու որոշմանը:

Նա նշել է, որ Ավստրիան, փակելով մզկիթները, նպատակ է հետապնդում մահմեդական համայնքներն օտարել իրարից և քաղաքական դիվիդենտներ շահել:

Ըստ Քալընի՝ սին պատրվակներով 7 մզկիթի փակումը և մահմեդական հոգևորականների (իմամ) արտաքսումը հետևանք է Ավստրիայում իսլամի դեմ դրսևորվող խտրական վերաբերմունքի:

«Ավստրիայի կառավարության գաղափարական դիրքորոշումը հակասում է միջազգային իրավունքի նորմերին, սոցիալական համերաշխության քաղաքականությանը, փոքրամասնությունների իրավունքներին և համակեցության էթիկային: Հակաիսլամիզմն ու ռասիզմը սովորական երևույթ դարձնող նման քայլերը միանշանակ մերժելի են»-հավելել է Էրդողանի խոսնակը:

Նշենք, որ Ավստրիայի կառավարությունը հայտարարել էր, որ երկրում գործունեություն ծավալող այն իմամները, որոնք ֆինանսավորվում են այլ երկրներից, արտաքսվելու են, իսկ 7 մզկիթ փակվելու է:

Աղբյուր` Haberler