Թուրքիան ԱՄՆ-ի դեմ բողոք է ներկայացրել Առևտրի միջազգգային կազմակերպությանը

Միջազգային07:28, 21 Օգոստոս 2018

Թուրքիան ԱՄՆ-ի դեմ բողոք է ներկայացրել Առևտրի միջազգգային կազմակերպությանը

Թուրքիայից ԱՄՆ ներկրվող պողպատի և ալյումինի հարկերի բարձրացման մասին Դոնալդ Թրամփի որոշումը կքննարկվի Առևտրի համաշխարհային կազմակերպությունում (ԱՀԿ- WTO)։ Թուրքական մամուլի տեղեկացմամբ՝ Անկարան ԱՀԿ-ում այս հարցը բարձրացրել է այն բանից հետո, երբ ամերիկացի հոգևորական Բրանսոնի կալանավորման շուրջ ծագած թուրք-ամերիկյան ճգնաժամի արդյունքում ԱՄՆ-ն որոշեց Թուրքիայի դեմ տնտեսական պատժամիջոցներ կիրառել։

ԱՀԿ-ն հնարավորություն կտա կողմերին՝ նախքան դատական գործընթաց սկսելը նստել բանակցությունների սեղանի շուրջ և փոխադարձ համաձայնության գալ։ Բայց եթե 60 օրվա ընթացքում երկուստեք ընդունելի լուծում չգտնվի, Թուրքիան իրավունք կունենա պահանջելու, որպեսզի ԱՀԿ ժողովը խնդրի վերաբերյալ որոշում կայացնի։ Նման որոշում կայացնելու համար կազմակերպությունը մինչև 14 ամիս ժամանակ կունենա։ Եթե կայացվելիք որոշումը բողոքարկվի, ապա որոշման վերանայումը կտևի ևս 3 -4 ամիս։

Թուրքիայի առևտրի նախարարությունը տեղեկացրել է, որ ԱՄՆ-ի դեմ դատական գործընթացն արդեն հարուցվել է և այս առումով Թուրքիան համագործակցելու է այն երկրների հետ, որոնք նույնպես ԱՄՆ-ի դեմ դատական հայց են ներկայացրել։

Աղբյուր` hürriyet.com.tr