Սպիտակ տուն. «Թուրքիայի և Կատարի հետ աշխատում ենք Քաբուլի օդանավակայանի անխափան գործունեությունն ապահովելու համար»

Միջազգային16:02, 01 Սեպտեմբեր 2021

Սպիտակ տուն. «Թուրքիայի և Կատարի հետ աշխատում ենք Քաբուլի օդանավակայանի անխափան գործունեությունն ապահովելու համար»

Ամերիկայի Միացյալ Նահանգները Թուրքիայի և Կատարի հետ աշխատում են Քաբուլի օդանավակայանի անխափան գործունեությունն ապահովելու ուղղությամբ:

Այս մասին ամենօրյա ճեպազրույցի ընթացքում հայտնել է Սպիտակ տան մամուլի քարտուղար Ջեն Փսակին՝ անդրադառնալով Աֆղանստանից ԱՄՆ-ի դուրս գալու գործընթացին և վերջին զարգացումներին:

Փսակին ընդգծել է, որ բոլորը պետք է վստահ լինեն, որ ԱՄՆ-ն ամեն ջանք գործադրելու է Աֆղանստանում մնացած իր քաղաքացիներին տարհանելու համար: Այս տեսանկյունից նա կարևորել է, որ Քաբուլի Համիդ Քարզայի օդանավակայանի գործունեությունը շարունակվի:

Հայտնելով, որ օդանավակայանի անխափան գործարկումը ձեռնտու է բոլորին՝ Փսակին նշել է, որ այն ոչ միայն հնարավորություն կընձեռի մարդկանց տարհանումն իրականացնել, այլև կապահովի հումանիտար օգնության ծրագրերի շրջանակներում պարենի փոխադրումը: