Թուրքիայում քրդամետ կուսակցության անդամները պատժվում են Հայոց ցեղասպանություն եզրույթն օգտագործելու համար

17:57, 08 Aralık 2022

Թուրքիայում քրդամետ կուսակցության անդամները պատժվում են Հայոց ցեղասպանություն եզրույթն օգտագործելու համար

Անկարայի հանրապետական գլխավոր դատախազությունը Թուրքիայի ՔՕ (Քրեական օրենսգիրք) 301-րդ հոդվածով (թրքությունը վիրավորելը) գործ է հարուցել քրդամետ «Ժողովուրդների դեմոկրատական» կուսակցության (ԺԴԿ-HDP) կենտրոնական գործադիր խորհրդի նախկին 11 անդամների դեմ 2021թ. ապրիլի 24-ին տարածված մամուլի հայտարարությունում «Հայոց ցեղասպանություն» եզրույթը գործածելու համար:

T24-ի փոխանցմամբ՝ առաջադրված մեղադրանքում նշվել է, որ տվյալ հոդվածով քննություն կարող է սկսվել միայն թույլտվության դեպքում, և Թուրքիայի արդարադատության նախարարությունը տվել է անհրաժեշտ թույլտվությունը:

Մեղադրանքում ընդգծվել է, որ ԺԴԿ-ի հայտարարությունում տեղ գտած խոսքերն ունեցել են թուրք ազգին պատմության և միջազգային հանրության առջև նվաստացնելու միտում: Ըստ մեղադրանքի՝ պահանջվել է ԺԴԿ 11 նախկին անդամներին պատժել 6 ամսից մինչև 2 տարի ազատազրկմամբ: