ERMENI HABER AJANSI

Թուրքական ոստիկանությունը հետաքննում է սաուդցի ընդդիմադիր լրագրողի գործը, ով հոկտեմբերի 2-ին մտել է Ստամբուլում Սաուդյան Արաբիայի հյուպատոսարան, ինչից հետո հարազատները չեն կարողացել կապ հաստատել նրա հետ, և առ այսօր անհայտ է մնում նրա գտնվելու վայրը:

Թուրքական ոստիկանությունն առավել  հավանական է համարում այն վարկածը, որ Քաշըքչըն սպանվել է Սաուդյան Արաբիայի հյուպատոսարանի շենքում: Նախօրեին էլ հրապարակված տեղեկություններից պարզ է դարձել, որ հոկտեմբերի 2-ին մասնավոր ինքնաթիռով Ստամբուլ են ժամանել 9 սաուդցի տղամարդիկ, որոնք կասկածվում են Քաշըքչըի սպանությունն իրականացնելու մեջ: Թուրքական ոստիկանությունը քաղաքի տարբեր տեղերի անվտանգության տեսախցիկների տեսագրության համադրումից պարզել է, որ Ստամբուլ ժամանած 9 սաուդցիները օդանավակայանից մեկնել են հյուրանոց, այնտեղից էլ՝ հյուպատոսարան, ավելի ուշ դուրս են եկել հյուպատոսարանից և նույն օրը վերադարձել Սաուդյան Արաբիա:

Հյուպատոսարանի անվտանգության տեսախցիկների ստուգման արդյունքում հայտնաբերվել է լրագրողի մուտքի տեսագրությունը, սակայն որևէ տեսախցիկ չի ֆիքսել վերջինիս՝ հյուպատոսարանի շենքից դուրս գալու պահը:

Այժմ ոստիկանությունը ուսումնասիրում է սաուդցիների խմբի հետագիծը՝ պարզելու համար, թե արդյոք նրանք աննկատ կերպով հյուպատոսարանի շենքից հանել են լրագրողի մարմինը և թաղել որևէ տեղ:

Հավանական է համարվում նաև այն հանգամանքը, որ խումբը մասնատել է լրագրողի մարմինը և տեղավորելով իրենց ուղեբեռի մեջ՝ կարողացել է անցկացնել օդանավակայանի ստուգումներն ու տեղափոխել Սաուդյան Արաբիա:

Հիշեցնենք, որ հոկտեմբերի 3-ին թուրքական մամուլում տեղեկություններ տարածվեցին այն մասին, որ Սաուդյան Արաբիայի վերաբերյալ քննադատական հոդվածներով հայտնի լրագրող, ամերիկյան «Washington Post» թերթի թղթակից Ջեմալ Քաշըքչըն մուտք է գործել Ստամբուլում Սաուդյան Արաբիայի հյուպատոսարանի շենք և այնտեղից դուրս չի եկել:  

Սկզբում ենթադրվում էր, որ Քաշըքչըն ձերբակալված պահվում էր Ստամբուլում հյուպատոսարանի շենքում, սակայն օրեր անց արդեն սկսեց շրջանառվել վերջինիս սպանված լինելու վարկածը: 

Նշվում է, որ Սաուդյան Արաբիայի քաղաքացի հանդիսացող Քաշըքչըն հյուպատոսարան էր այցելել ամուսնալուծության վերաբերյալ փաստաթղթերը վերցնելու նպատակով:

ԱՄՆ-ում բարձրագույն կրթություն ստացած Քաշըքչըն աշխատել է տարբեր սաուդական լրատվամիջոցներում՝ մշտապես հանդես գալով իշխանություններին քննադատող հոդվածներով: Իր երկրում հետապնդումների ենթարկված լրագրողը վերջին շրջանում թղթակցում էր ամերիկյան «Washington Post» թերթին, որտեղ նույնպես հանդես էր գալիս Սաուդյան Արաբիայի իշխանություններին քննադատող հոդվածներով: