Ստամբուլի դատարանը որոշել է ազատ արձակել Դեմիրթաշին, բայց նա բանտից դուրս գալ չի կարող

Իրավական12:01, 01 Նոյեմբեր 2019

Ստամբուլի դատարանը որոշել է ազատ արձակել Դեմիրթաշին, բայց նա բանտից դուրս գալ չի կարող

Թուրքիայի ընդդիմադիր քրդամետ «Ժողովուրդների դեմոկրատական» կուսակցության (ԺԴԿ-HDP) նախկին համանախագահ Սելահաթթին ԴԵմիրթաշի վերաբերյալ ազատ արձակման որոշում է կայացվել։

2018թ․ Ստամբուլի ծանր հանցագործությունների դատարանը «Զինված ահաբեկչական խմբավորման պրոպագանդա կատարելու» մեղադրանքով ընդդիմադիր գործչին դատապարտել էր 4 տարի 8 ամիս ազատազրկման։ Վճռի օրինական ուժի մեջ մտնելուց հետո Դեմիրթաշը դիմել էր պայմանականորեն ազատ արձակվելու համար, սակայն դիմումը մերժվել էր։

Օրերս Թուրքիայում օրինական ուժի մեջ մտած դատաիրավական բարեփոխումների փաթեթը մինչև 5 տարի ազատազրկման դատապարտվածներին հնարավորություն տվեց դիմելու Գերագույն դատարան և Դեմիրթաշի փաստաբանները ևս մեկ անգամ պայմանական ազատման դիմում ներկայացրեցին։ Այս անգամ ստամբուլյան դատարանը բավարարեց դիմումը՝ որոշելով ազատ արձակել ընդդիմադիր գործչին։

Սակայն ԺԴԿ նախկին համանախագահը, այնուամենայնիվ, չի կարող դուրս գալ Էդիրնեի բանտից, որտեղ գտնվում է 2016թ․ նոյեմբերից։ Խնդիրն այն է, որ դեռևս ուժի մեջ է մնում Անկարայի գլխավոր հանրապետական դատախազության՝ Սելահաթթին Դեմիրթաշի և ԺԴԿ մյուս նախկին համանախագահ Ֆիգեն Յուքսեքդաղի դեմ հարուցված մեկ այլ գործով վերջիններիս կալանավորման որոշումը։

Հիշեցնենք, որ 2019թ․ սեպտեմբերին Անկարայի ծանր հանցագործությունների դատարանը «Ահաբեկչական խմբավորում ղեկավարելու», «ահաբեկչական խմբավորման օգտին քարոզչություն վարելու», «հանրության շրջանում հրապարակայնորեն ատելություն և թշնամանք հրահրելու», «ժողովրդին օրինախախտության դրդելու» մեղադրանքով Դեմիրթաշի դեմ հարուցված գործի շրջանակներում որոշում էր կայացրել վերջինիս պայմանականորեն կալանքից ազատելու մասին, սակայն Ստամբուլի դատարանի սահամանած ազատազրկման պատժի պատճառով Դեմիրթաշին կրկին չէր հաջողվել դուրս գալ բանտից։

Աղբյուր` evrensel.net

Այս ենթաբաժնի վերջին նորությունները

15:17, 12 սեպ

Եվրադատարանում ամենաշատ դիմումներ ունեցող երկիրը Թուրքիան է

Ընթացիկ տարվա տվյալների համաձայն՝ ՄԻԵԴ-ում քննվող 62.850 գործերից 21.800-ը վերաբերում է Թուրքիային։

11:50, 11 սեպ

Թուրքիայում 10 խոշոր ձեռնարկատեր կձերբակալվի

Նրանց թվում են «Can Holding»-ի ղեկավարները, որոնք մեղադրվում են «հանցավոր կազմակերպություն ստեղծելու», «մաքսանենգության», «խարդախության» և «փողերի լվացման» մեջ։