Ինչու՞ է մեր մամուլը հերոսացնում Ցեղասպանութունը ժխտող թուրքահայուհուն

Հասարակական09:05, 23 Մայիս 2012

Ինչու՞ է մեր մամուլը հերոսացնում Ցեղասպանութունը ժխտող թուրքահայուհուն

Վերջին օրերին հայկական մամուլում տեղ են գտնում կիսով չափ հայ, կիսով չափ թուրք աշակերտուհու` Թուրքիայում շարադրությունների մրցույթում մրցանակ շահելու մասին լուրերը: 14-ամյա Կլարա Յեթերօղլուն իր շարադրությունում անդրադարձել է իր ազգային պատկանելությանը և իրեն իրավունք վերապահելԹուրքիայի հայության անունից բողոք հայտնել երկու ժողովուրդների խաղաղ գոյակցությունը չցանկացողների դեմ:

Շարադրությունը մեծ ոգևորություն է առաջացրել նաև հայկական մամուլում, ինչը փաստում են նույնիսկ թուրքական թերթերը: Իսկ ըստ թուրքական «Աքշամ» օրաթերթի` շարադրությունը նույնիսկ հրապարակվել է ԱՄՆ-ում Հայոց ցեղասպանության հետազոտությունների կենտրոնի բլոգում:

Հայկական մամուլի լուրերը կարդալիս տեղեկատվությանն ամբողջությամբ չտիրապետող ընթերցողը տպավորություն է ստանում, թե Կլարան իր շարադրությամբ խաղաղության կոչ է անում մարդկությանը և մրցանակը ստացել է հենց այդ առաքելության համար: Մինչդեռ իրականում հայկական մամուլում Կլարայի շարադրությունը ներկայացվում է հատվածաբար ու թերևս այդ իսկ պատճառով ուշադրությունից դուրս են մնում որոշ շատ էական հատվածներ:

Մասնավորապես. «Ես մի կողմով մահմեդական թուրք եմ, մյուսով` քրաստոնյա հայ: Վերջին տարիներին տեսնելով, որ արտաքին ուժերը մեր երկիրում ուզում են «խառնակչություն անել», իմ մեջ հարց է առաջացել. ինչու՞ են ցանկանում դարերով կողք-կողքի ապրած երկու բարեկամ ժողովրդի իրար դեմ տրամադրել: Ես ո°ր կողմից պետք է լինեմ: Կամ արդյո՞ք պարտավոր եմ որևէ մեկի կողմից լինել: Դրսում չեն ցանկանում, որ մենք Թուրքիայում խաղաղ ապրենք»,-գրում է նա:

Արդյոք ու՞մ նկատի ունի աղջիկը` ասելով « դրսից մեր երկրում ուզում են «խառնակչություն անել»: Կամ «ինչու՞ են ցանկանում դարերով կողք-կողքի ապրած երկու բարեկամ ժողովրդի իրար դեմ տրամադրել» ասելով, Կլարան կարծես «միամտաբար» մոռանում երկու «բարեկամ ժողովրդի» թշնամի դառնալու իրական պատճառը և մեղքը բարդում արտաքին ուժերի վրա: Սա թուրք քաղաքական գործիչների մոտ շատ ընդունված հնարք է:

Մեր լրատվամիջոցների ուշադրությունից վրիպել է նաև Կլարա Յեթերօղլուի շարադրության վերջաբանը. «Զզվել եմ այն մարդկանցից, ովքեր ցանկանում են ստիպել, որ մենք կրենք տարիներ առաջ տեղի ունեցած իրադարձությունների հետևանքները: Ուզում եմ, որ մեզ հանգիստ թողնեն և չխառնվեն մեր խաղաղ ապրելակերպին»:

«Տարիներ առաջ տեղի ունեցած իրադարձություններ» ասելով` աշակերտուհին նկատի ունի 1.5 միլիոն հայերի սպանդը: Իսկ «մենք կրենք» ձևակերպումն ակնհայտորեն վերաբերում է թուրք հանրությանը, այսինքն «մենք` նոր սերնդի թուրքերս»:

Այսքանից հետո ցավով պետք է փաստենք, որ հայկական լրատվամիջոցները հերթական անգամ խայծ կուլ տվեցին` ներկայացնելով, թե իբր Թուրքիան մրցանակ է տալիս խաղաղության կոչ անող հայազգի աշակերտուհուն: Իրականում Թուրքիան մրցանակ է տալիս Հայոց ցեղասպանությունը մոռանալ կոչ անող աղջնակին: