Էրզրումի հայկական տան շնորհիվ թուրք եղբայրները միլիոնատեր են դարձել

Հասարակական08:55, 03 Հուլիս 2012

Էրզրումի հայկական տան շնորհիվ թուրք եղբայրները միլիոնատեր են դարձել

Այժմ Թուրքիայի տարածքում գտնվող Էրզրում (պատմական Կարին) քաղաքի իշխանությունները սկսել են վերականգնել քաղաքի պատմամշակութային արժեք ներկայացնող շինությունները: Նախագծի մեջ ներառված է նաև 300 տարի առաջ կառուցված Աքյուլ եղբայրներին պատկանող երկհարկանի տունը, որը զբաղեցնում է 435քմ տարածք: Առաջին հարկը կառուցված է հայկական ճարտարապետության ոճով, երկրորդը` օսմանյան: Տանտերերը նշել են, որ այն գնել է իրենց հայրը դեռևս 1968 թվականին:

Թուրքական «Sondakika» լրատվական կայքը տեղեկացնում է, որ այդ տան շնորհիվ Աքգյուլ եղբայրները միանգամից դարձել են միլիոնատեր. քաղաքապետարանի բյուջեից նրանց վճարվել է 1մլն թուրքական լիրա: Նշվում է, որ Էրզրումի պատմական շինությունները վերականգնելու ծրագիրն իրականացնելու համար նախատեսված է 50 միլիոն լիրա բյուջե (30 մլն դոլար):

Հիշեցնենք, որ Կարինը Հայկական լեռնաշխարհի հնագույն բնակավայրերից է: Պատմիչների վկայությամբ` այն հիմնադրվել է Ք. Ա. 2-րդ հազարամյակի կեսերին հայոց թագավոր Կարաննիի կողմից, որից էլ ծագել է «Կարին» տեղանունը: 1049թ., երբ սելջուկ-թուրքերը հիմնահատակ կործանում են Արծն քաղաքը, նրա բնակիչները վերաբնակվում են Կարինում և այն իրենց հայրենի քաղաքի անունով կոչում Արզն Ռում (այսինքն բյուզանդացիների Արծն): Այդ անունից էլ հետագայում աոաջանում են հայկական Կարինի թուրք-արաբական տարբերակները` Արզրում, Էրզրում: