Չանաքկալեի ճակատամարտի հայ հերոսը

Հասարակական11:20, 10 Օգոստոս 2012

Չանաքկալեի ճակատամարտի հայ հերոսը

«Չանաքկալեում մի հայ սպա կար` Սարգիս Թորոսյան: Նա Կեսարիայից էր: Հրետանու հրամանատար էր: Հակառակորդի մի քանի նավ էր խորտակել: Մարտերից մեկում ծանր վիրավորվել էր: Էնվեր փաշայից պատվոգիր էր ստացել: Լեյտենանտի կոչում ուներ, հասավ մինչև մայոր: Արժանացել էր նաև օսմանյան բանակի շքանշանի»,- գրում է Թուրքական «Սաբահ» (Sabah) օրաթերթի սյունակագիր Էնգին Արդըչը:

Վերջինս իր հոդվածում անդրադարձել է այն փաստին, որ թուրքերի կողմից այդքան փառաբանվող Չանաքկալեի (Դարդանելի) հաղթական ճակատամարտում մասնակցություն են ունեցել նաև հայեր, հույներ, արաբներ, եզդիներ: Հոդվածագիրն ընդգծում է, որ այն ժամանակ, երբ Սարգիս Թորոսյանը Չանաքկալեում մարտնչում էր Թուրքիայի համար, նույն այդ օրերին` 1915թ. ամռան սկզբին, Կեսարիայում թուրքերը կոտորում էին նրա ծնողներին:

«Իթթիհաթ վե Թերաքի» (Միություն և առաջադիմություն) կուսակցության առաջին դեմքը Թորոսյանին պատվոգիր էր ուղարկում, «Իթթիհաթ վե Թերաքի»-ի խուժանը նրա ընտանիքին էր կոտորում»,- նշում է հոդվածագիրը:

Այնուհետև հոդվածում պատվում է, որ 1917թ. Սարգիսը վերադառնում տուն և ոչ մի կենդանի հարազատ չի գտնում: Նրանցից որևէ մեկին ողջ գտնելու հույսով մեկնում է Սիրիա: Այնտեղ գտնում է կոտորածից մազապուրծ եղած քրոջը: Նա ըմբոստանում է Օսմանյան կայսրության դեմ: 1918-ի գարնանը միանում արաբ ամպստամբերին: Հետո Սարգիսը հալածյալ բազմաթիվ հայերի նման մեկնում և հաստատվում է Միացյալ Նահանգներում: