Վերաբացվել է Մերձավոր Արևելքի ամենամեծ հայկական եկեղեցին

Հասարակական08:42, 05 Նոյեմբեր 2012

Վերաբացվել է Մերձավոր Արևելքի ամենամեծ հայկական եկեղեցին

Ըստ թուրքական «Dogan» լրատվական գործակալության` Թուրքիայի Դիարբեքիր նահանգի (պատմական Աղձնիք) Սուրբ Կիրակոս հայկական եկեղեցին 32 տարվա դադարից հետո բացել է իր դռները հավատացյալ հոտի առաջ: Մատուցվել է պատարագ` Պոլսո հայոց պատրիարքի փոխանորդ, Արամ արքեպիսկոպոս Աթեշյանի հանդիսապետությամբ: Պատարագին մասնակցել են բազմաթիվ հայ ուխտավորներ Հայաստանից, ԱՄՆ-ից և Կանադայից:

Սուրբ Կիրակոս եկեղեցին Մերձավոր Արևելքի հայկական եկեղեցիներից ամենամեծն է: Երկուսուկես տարվա ընթացքում վերանորոգվելուց հետո եկեղեցու գմբեթին ամրակցվել է Մոսկվայում պատրաստված 100կգ բրոնզեձույլ խաչ: Վերանորոգման ծախսերը հոգացել է հայկական համայնքը: Ֆինանսական աջակցություն է եղել նաև Դիարբեքիրի քաղաքապետարանի կողմից:

Հիշեցնենք, որ Սուրբ Կիրակոս եկեղեցին կառուցվել է 1376թ.: Եկեղեցու զանգակատունը բարձր է եղել շրջակա մզկիթների աշտարակներից, այդ պատճառով մահմեդականները 1915-ին հրետակոծել և մասամբ փլուզել են այն: Առաջին աշխարհամարտի տարիներին գերմանական զորքերի համար եկեղեցու շենքը ծառայել է որպես զինվորական շտաբ: Իսկ հետպատերազմյան տարիներին հայկական այդ եկեղեցին օգտագործվել է որպես բամբակի պահեստ: