Թուրքիան աշխարհի ամենամեծ բանտն է լրագրողների համար

Հասարակական11:32, 20 Դեկտեմբեր 2012

Թուրքիան աշխարհի ամենամեծ բանտն է լրագրողների համար

«Լրագրողներ առանց սահմանների» իրավապաշտպան կազմակերպության 2012թ. զեկույցում արձանագրված է, որ Թուրքիան աշխարհի միակ երկիրն է, որտեղ բանտարկված լրագրողների թիվն ավելացել է: Եվ սա այն դեպքում, երբ աշխարհի մյուս երկրներում այս տարի հիմնականում նկատվել է անազատության մեջ պահվող լրագրողների թվի նվազեցում:

Թուրքական «Bianet» կայքի տեղեկացմամբ` հիշյալ զեկույցում մասնավորապես ասված է հետևյալը. «Ներկա դրությամբ 72 լրագրող է պահվում թուրքական բանտերում, որոնցից 42-ը ձերբակալվել են իրենց մասնագիտական գործունեության կապակցությամբ: Նման իրավիճակը Թուրքիային դարձնում է աշխարհի ամենամեծ բանտը լրագրողների համար»:

Զեկույցում նշվում է նաև, որ քիչ թե շատ արված վերջին շրջանի օրենսդրական բարեփոխումները այդուամենայնիվ, չկարողացան Թուրքիայում վերացնել ահաբեկչության դեմ պայքարի անվան տակ լրագրողների ձերբակալություններն ու հետապնդումները:

«Ճնշող օրենքները և դրանց վրա հենվող դատաիրավական համակարգը Թուրքիայում բավականաչափ հարգանք չեն ցուցաբերում տեղեկատվության ազատության և արդար դատավարության իրավունքներին»:

Ermenihaber.am