Նոր զարգացումներ Դինքի գործով դատավարությունում

Հասարակական08:42, 11 Հունվար 2013

Նոր զարգացումներ Դինքի գործով դատավարությունում

Թուրքական «Հյուրրիյեթ» (Hurriyet) պարբերականի տեղեկացմամբ` նոր զարգացումներ են հասունանում 2007թ. հունվարի 19-ին «Ակոս» շաբաթաթերթի խմբագրատան դիմաց հրազենային կրակոցից սպանված պոլսահայ ականավոր գործիչ Հրանտ Դինքի գործով դատավարությունում:

Վճռաբեկ դատարանի գլխավոր դատախազությունը պահանջում է չեղարկել Ստամբուլի առաջին ատյանի դատարանի` 2012-ի հունվարի 17-ին ընդունած որոշումը, որի արդյունքում դատապարտվել էր միայն մեղադրյալներից մեկը, իսկ մնացած 19-ը` արդարացվել: Վճռաբեկի պատրաստած եզրակացությունը վիճարկում է Դինքի գործով հիշյալ 19 մեղադրյալի նկատմամբ կայացված արդարացման վճիռը: Եզրակացությունում քննության են առնված հանցավոր խմբավորման ստեղծման բոլոր դետալները: Ընգծվում է, որ հանցանք գործելու համար կազմակերպված խումբ ստեղծելն արդեն իսկ վտանգավոր հանցագործություն է:

Վճռաբեկը հիմնավորումներ է ներկայացրել այն մասին, որ Դինքին սպանելու համար հավաքված հանցավոր խումբը նպատակ է ունեցել ոչ միայն կազմակերպել շարքային քաղաքացու սպանություն, այլև կատարել հասարակական կարգը խաթարող, անվստահության մթնոլորտ ձևավորող, քաոս առաջացնող, Թուրքիայի միջազգային հեղինակությանը վնաս հասցնող գործողություններ:

Ermenihaber.am