Սևակ Շահինի սպանության գործով նոր մանրամասներ

Հասարակական06:59, 29 Հունվար 2013

Սևակ Շահինի սպանության գործով նոր մանրամասներ

Թուրքական լրատվամիջոցների տեղեկացմամբ` նոր մանրամասներ են ի հայտ եկել 2011թ. ապրիլի 24-ին Բաթմանի զորամասում թուրք զինվորի կողմից սպանված ժամկետային զինծառայող ազգությամբ հայ Սևակ Բալըքչըի գործով դատավարությունում: Պաշտոնական վարկածի համաձայն` Սևակի սպանությունն անզգուշության հետևանք է. շարքային Քվանչ Աղաօղլուն իբր իրեն ամրակցված զենքից անզգուշաբար կրակ է բացել Սևակի վրա:

Սպանության գործով հերթական դատալսմանը ներկայացվել է դեպքի վայրում կատարված զննության եզրակացությունը: Պարզվում է, որ Սևակին հրազենային վնասվածք հասցնելուց հետո Աղաօղլուն մյուս զինվորների օգնությամբ նրա մարմինը տեղափոխել են զորամասի հսկիչ անցագրային կետ: Այնուհետև հիշյալ վայր են տարվել նաև այն զենքը, որով կատարվել է սպանությունը և դեպքի վայրից հավաքել են դատարակ պարկուճները, մինչդեռ հարկավոր էր դրանց ձեռք չտալ և թողնել դեպքի վայրում որպես իրեղեն ապացույցներ:

Իրավապահ մարմինների ժամանումից հետո վերոնշյալ իրեղեն ապացույցները դարձյալ հետ են տարվել դեպքի վայր: Իրեղեն ապացույցների դիտավորյալ այս տեղափոխությունները կասկածի տակ են առնում Սևակին անզգուշաբար սպանելու մասին պաշտոնական վարկածը:

Ermenihaber.am