Նոր զարգացում Դինքի դատավարությունում. գաղտնի վկան ցուցմունք է տվել

Հասարակական13:36, 11 Փետրվար 2013

Նոր զարգացում Դինքի դատավարությունում. գաղտնի վկան ցուցմունք է տվել

Հրանտ Դինքին սպանած Օգյուն Սամասթի գործը քննող անչափահասների ծանր հանցագործությունների դատարանը լսել է գաղտնի վկայի ցուցմունք:

Թուրքական «Բիրգյուն» (Birgün) օրաթերթը գրում է, որ վկան իր ցուցմունքում պնդել է, թե Դինքի սպանությունը իրականացվել է կազմակերպված հանցավոր խմբավորման կողմից, և այդ կազմակերպությանը վերաբերող մանրամասներ է բացահայտել: Ցուցմունքն ուղարկվել է Թուրքիայի գլխավոր դատախազին` Մուամմեր Աքքաշին: Ըստ աղբյուրի` այս զարգացումը կփոխի դատավարության ընթացքը:

Դինքի ընտանիքի փաստաբան Հաքան Բաքըրջըօղլուն, հաստատելով, որ նման վկայություն իսկապես կա, ասել է. «Քանի որ գաղտնի վկայի անվտանգությունը կասկածի տակ է, այս զարգացման մասին հայտարարություն չի արվում: Բայց հաստատում եմ այն տեղեկությունը, որ այս պահին դատարանում է գաղտնի վկայի կես էջանոց ցուցմունքը և 5 էջից բաղկացած նամակը»:

Ermenihaber.am