Թուրքիայի հայերը օգնության ձեռք են մեկնում սիրիահայերին

Հասարակական11:09, 22 Փետրվար 2013

Թուրքիայի հայերը օգնության ձեռք են մեկնում սիրիահայերին

Թուրքիայի հայկական համայնքը, հագուստ, ուտելիք և առաջին անհրաժեշտության այլ իրեր է հավաքել քաղաքացիական պատերազմի պատճառով օրհասական վիճակում հայտնված սիրիահայ ազգակիցներին օգնելու նպատակով:

Օգնությունը սիրիահայերին փոխանցվելու է թուրքական «Քըզըլայ» (կարմիր մահիկ) կազմակերպության միջոցով: Կազմակերպության նախագահ Լյութֆի Աքարը թուրքական «Անատոլիա» (Anadolu) լրատվական գործակալության թղթակցի հետ զրույցում ասել է, որ Պոլսո հայոց պատրիարքի փոխանորդ, արքեպիսկոպոս Արամ Աթեշյանն է ցանկություն հայտնել, որ համայնքի հավաքած օգնությունը «Քըզըլայ»-ի միջոցով հասցվի սիրիահայ կարիքավորներին:

Լյութֆի Աքարն էլ այդ մարդասիրական նախաձեռնությանն աջակցելու պատրաստակամություն է հայտնել` ասելով. «Երբ խոսքն օգնության մասին է, մենք կրոնական լեզվական, սեռային կամ ռասայական խտրականություն չենք դնում»:

Ermenihaber.am