Դիարբեքիրի մզկիթներում ուրբաթօրյա քարոզն առաջին անգամ քրդերեն է եղել

Հասարակական06:52, 02 Մարտ 2013

Դիարբեքիրի մզկիթներում ուրբաթօրյա քարոզն առաջին անգամ քրդերեն է եղել

Թուրքիայի վարչապետ Ռեջեփ Թայիփ Էրդողանը օրերս իր ելույթներից մեկում, անդրադառնալով մզկիթներում կատարվող քարոզներին, ասել էր . «Կարևորը ոչ թե կրոնական քարոզի «հութբե» լեզուն է , այլ` բովանդակությունը: Այն թուրքերեն է կատարվում, բայց զերծ չէ արաբերենից, որը մինչև հիմա էլ հասկանալի չէ թուրքերի համար, եթե ինչ-որ մեկն ասի, որ քրդերենն իրեն ավելի հասկանալի է,ապա դա պետք է հաշվի առնել»:

Ինչպես հայտնում է թուրքական «Իհլաս» (Іhlas) լրատվական գործակալությունը, Էրդողանի այս հայտարարությունից հետո Դիարբեքիրի Հաջը Սըդըք մզկիթի իմամ Աբդուլվասի Յազը ուրբաթօրյա քարոզը կարդացել է քրդերեն լեզվով: Իմամ Աբդուլվասի Յազն իր գոհունակությունն է հայտնել այդ կապակցությամբ և ասել, որ սա կնպաստի քրդական համայնքի մեջ հավատի ամրապնդմանը` հավելելով որ այսպիսով իրենք ավելի հեշտությամբ են իրենց խոսքը հասանելի դարձնում ժողովրդին:

Քրդական համայնքում էլ ուրբաթօրյա քարոզն առաջին անգամ քրդերեն լսելով, սկզբում զարմացել, այնուհետև իրենց գոհունակությունն են հայտնել այդ կապակցությամբ: Նրանցից շատերն էլ շնորհակալություն են հայտնել Էրդողանին քրդերենով քարոզ թույլատրելու համար:

Ermenihaber.am