Թուրք գյուղացիները տրակտորներով «գրոհել» են Բաթման քաղաքը

Հասարակական10:41, 05 Մարտ 2013

Թուրք գյուղացիները տրակտորներով «գրոհել» են Բաթման քաղաքը

Թուրքիայի Բաթման նահագի Զորքյոյ և Յենիքյոյ գյուղերի բնակիչները, որոնցից տարիներ շարունակ խլել են իրենց հողատարածքները, տրակտորներով «գրոհելով» Բաթման քաղաքի կենտրոնը, հետ են պահանջել իրենց հողամասերը: Նահանգապետարանի շենքի դիմաց՝ Թուրգութ Օզալի անվան այգում, ճանապարհային ոստիկանության աշխատակիցների և գյուղացիների միջև լարվածություն է առաջացել: Ճանապարհային ոստիկանության աշխատակիցների ուժերի անբավարար լինելու պատճառով, դեպքի վայր արագ արձագանքման ուժեր և ոստիկանության հատուկ ջոկատայիններ են ուղարկվել:

Դեպի Նահանգապետարան շարժվող գյուղացիներին ոստիկանները կանգնեցրել են` ֆիզիկական ուժ կիրառելով: Գյուղացիների և ոստիկանների միջև տեղի ունեցած բանակցություններից հետո 5 գյուղացու թույլ է տրվել հանդիպել Բաթմանի նահանգապետի հետ: Վերջիններս ներկայացրել են իրենց խնդիրը և հայտարարել, որ շարունակելու են պայքարը մինչը լուծվի խնդիրը: Ոստիկանների 1 ժամյա բանակցություններից հետո գյուղացիները նաև բացել են տրակտորներով փակած ճանապարհը :

Ermenihaber.am