Պոլսահայ լրագրող Սևան Նշանյանի դեմ քրեական գործ է հարուցվել

Հասարակական07:38, 06 Մարտ 2013

Պոլսահայ լրագրող Սևան Նշանյանի դեմ քրեական գործ է հարուցվել

Թուրքիայում բնավող ազգությամբ հայ գրող, լրագրող, լեզվաբան Սևան Նշանյանի դեմ դատական հայց է ներկայացվել: Տասնհինգ քաղաքացի հայց է ներկայացրել դաստարան` բողոքելով, որ Նշանյանն իր կայքում հրապարակել է Մուհամեդ մարգարեի հասցեին վիրավորանք պարունակող հոդված:

Ստամբուլի հանրապետական դատախազությունն այդ կապակցությամբ քրգործ է հարուցել Սևան Նշանյանի դեմ: Վերջինս մեղադրվում է ժողովրդի մի մասի կրոնական արժեքները հրապարակավ նսեմացնելու` տվյալ դեպքում Մուհամեդի մասին վիրավորական կարծիք հայտնելու մեջ: Առաջիկա օրերին սպասվում է, որ Նշանյանին կկանչեն Ստամբուլի քրեական դատարան:

Այս մասին տեղեկացնող թուրքական «Անադոլու» լրատվական գործակալությունը նաև հայտնում է, որ առաջադրված մեղադրանքով հայ լրագրողին սպառնում է 9 ամսից մինչև 1.5 տարվա բանտարկություն:

Հիշեցնենք, որ «Լրագրողներ առանց ահմանների» իրավապաշտպան կազմակերպության 2012թ. զեկույցում Թուրքիան ճանաչվել էր աշխարհի միակ երկիրը, որտեղ բանտարկված լրագրողների թիվն ավելացել էր:

«Ներկա դրությամբ 72 լրագրող է պահվում թուրքական բանտերում, որոնցից 42-ը ձերբակալվել են իրենց մասնագիտական գործունեությունը կատարելիս: Նման իրավիճակը Թուրքիային դարձնում է աշխարհի ամենամեծ բանտը լրագրողների համար»,- ասված է եղել զեկույցում: