Times. «Անկարան լրագրողների համար աշխարհի ամենամեծ բանտն է ստեղծել»

Հասարակական10:30, 26 Մարտ 2013

Times. «Անկարան լրագրողների համար աշխարհի ամենամեծ բանտն է ստեղծել»

Թուրքական «Վաթան» օրաթերթը ուշադրություն է հավիրում Մեծ Բրիտանիայի առաջատար թերթերից Times-ի` Թուրքիայի իշխանություններին խստորեն քննադատող հոդվածի վրա, որտեղ հեղինակն անդրադառնում է Թուրքիայում մամուլի, խոսքի ազատության սահմանափակումներին և լրագրողների նկատմամբ գործադրվող ճնշումներին: Պարբերականը նշում է, որ թանկ են վճարում այն լրագրողները, ովքեր չեն արդարացնում Թուրաքիայի վարչապետ Ռեջեփ Թայիփ Էրդողանի` իր անձի նկատմամբ սիրահոժար լինելու սպասումը:

«Անկարան, որտեղ գնալով ուժեղանում է միանձնյա ղեկավարումը, լրագրողների համար նախատեսված աշխարհի ամենամեծ բանտն է ստեղծել»,-ասված է հոդվածում:

Թուրքականը թերթը, մեջբերում է «Լրագրողների պաշտպանության» կոմիտեի պնդումը, թե Թուրքիան կալանավայրերում գտնվող լրագրողների թվով (շուրջ 49) գերազանցում է անգամ Չինաստանին և Իրանին:

Իսկ լրագրողների նկատմամբ ճնշման ամենավառ օրինակը, ըստ բրիտանական լրատվամիջոցի, Հայոց ցեղասպանության կազմակերպիչներից Ջեմալ փաշայի թոռան` Հասան Ջեմալի հեռացումն էր «Միլլիյեթ» օրաթերթից, որի պատճառը, ըստ որոշ տվյալների, նրա կողմից Հայոց ցեղասպանության փաստի ընդունումն էր և այդ մասին գիրք գրելը:

Հիշեցնենք, որ Հասան Ջեմալը «1915. Հայոց ցեղասպանություն» վերնագրով գիրք է հրատարակել այս տարվա հունվարին և այն նվիրել 2007-ին սպանված «Ակոս» շաբաթաթերթի հիմնադիր խմբագրապետ Հրանտ Դինքի հիշատակին:

«Արդարություն և զարգացում» կուսակցությունը մեկ բան չի հասկացել. խոսքի ազատությունը, ոչ թե ժողովրդավարության անքակտելի մասն է, այլ հենց ժողովրդավարությունն է», - եզրափակվում է հոդվածը:

Ermenihaber.am