Հրապարակվել է թուրքական բանակում սպանված հայ զինվորի գործով մեղադրական եզրակացությունը

Հասարակական11:04, 26 Մարտ 2013

Հրապարակվել է թուրքական բանակում սպանված հայ զինվորի գործով մեղադրական եզրակացությունը

Երկու տարի առաջ Թուրքիայի Բաթման նահանգի Քոզլուքի շրջանի զորամասում զինծառայության մեջ գտնվող հայազգի Սևակ Շահին Բալըքչըն սպանվել էր ծառայակից թուրք զինվորի կրակոցից: Հարուցված քրգործով զբաղվում է Դիարբեքիրի ռազմական դատարանը: Սպանության մեջ մեղադրվում է Քըվանչ Աղաօղլուն, իսկ նույն զորամասի ենթասպա Սադրեթին Էրսոզի դեմ առաջադրվել է ծառայողական պարտականությունները լավ չկատարելու մեղադրանք:

«CNNTurk» լրատվական ծառայության տեղեկացմամբ` կայացած հերթական դատական նիստից հետո ռազմական դատախազը հրապարակել է մեղադրական եզրակացությունը, համաձայն որի, կատարված սպանության մեջ դիտավորության ոչ մի նշան չի հայտնաբերվել և Քըվանչ Աղաօղլուի հանցագործությունը դիտվում է որպես անփութության հետևանք: Դատախազը Քըվանչ Աղաօղլուի և Սադրեթին Էրսոզի համար դատարանից պահանջել է 2-6 տարվա ազատազրկում:

Նշենք, որ Սևակի ընտանիքը սպանության դժբախտ պատահաբար լինելու վարկածին չի հավատում։ Սևակի մայրը՝ Անի Բալըքչըն, բազմիցս հայտարարել է, որ իր որդու սպանությունը դժբախտ պատահար որակելն ամոթ է։