ERMENI HABER AJANSI

«Արդարություն Սևակի համար» հասարակական նախաձեռնությունը Ստամբուլում քննարկել է Սևակ Բալըքչըի սպանության գործով դատավիճռը: Ինչպես հաղորդում է թուրքական «Ջիհան» լրատվական գործակալությունը, քննարկմանը ներկա են եղել նաև Սևակի ծնողները և փաստաբան Ջեմ Հալավուրթը: Վերջինս ուշադրություն է հրավիրել նախաքննական գործընթացի թերությունների վրա. դեպքի վայրի տեղազննության և դատախազության եզրակացության արձանագրությունները կազմված են եղել մակերեսորեն, ինչի հետևանքով էլ մեջտեղ է բերվել չկանխամտածված սպանության հանգամանքը:

Սևակի հայրը` Կարապետ Բալըքչըն արձագանքելով այն փաստին, որ Թուրքիայի Հանրապետությունում սպանված քրիստոնյա զինվորները նահատակ (şehit) չեն համարվում, ասել է «Հապա ինչու՞ եք Թուրքիայում քրիստոնյաներին բանակ տանում»:

Անդրառնալով դատավճռին` հայտարարել է, որ այն իրենց չի բավարարում,  և մտադիր են բողոք ներկայացնել  Վճռաբեկ դատարանում: «Այստեղ էլ, եթե արդյունք չլինի, կդիմենք Մարդու իրավունքների եվրոպական դատարան (ՄԻԵԴ): Մեզ միայն  ճշմարտության բացահայտումը կբավարարի: Ես դա եմ ակնկալում: Սա հանցագործություն էր և ուրշ ոչինչ»,-եզրափակել է Սևակի հայրը:

Ermenihaber.am