«Ագօս»-ի գլխավոր խմբագրի դեմ հետաքննություն է սկսվել

Հասարակական08:59, 04 Ապրիլ 2013

«Ագօս»-ի գլխավոր խմբագրի դեմ հետաքննություն է սկսվել

Ստամբուլի հանրապետական դատախազությունը հետաքննություն է սկսել «Ագօս» շաբաթաթերթի գլխավոր խմբագիր Ռոբեր Քոփթաշի և խմբագիր Ումիթ Քըվանչի դեմ: Հետաքննության նյութ են դարձել Դինքի սպանության դատավճռի կայացման օրը Քոփթաշի և Քըվանչի` հեռուստաեթերի ժամանակ հնչեցրած խոսքերը

Այս մասին տեղեկացնող «Ագօս» շաբաթաթերթը հիշեցնում է, որ 2012-ի հունվարի 17-ին նրանք եղել են «Հաբեթ թուրք» հեռուստաալիքի «Խոսքը քոնն է» հաղորդման հյուրը և գնահատականներ տվել Դինքի գործով կայացված վճռի վերաբերյալ: Հաղորդման հեռարձակումից անմիջապես հետո Անթալիայի բնակիչ, Թուրքիայի քաղաքացի Այդըն Թաշչըն հայցադիմում է ներկայացրել Ստամբուլի դատախազություն: Նա որպես թուրք անընդունելի է համարել Քոփթաշի և Քըվանչի այն խոսքը, թե Թուրքիան մարդասպան պետություն է: Ստամբուլի դատախազ Ֆիքրեթ Սեչենն էլ ընթացք տվել գործին: Քոփթաշն ու Քըվանչը առաջիկա օրերին կկանչվեն հարցաքննության:

«Ագոս»-ի փաստաբաններից Հաքան Բաքըրջըօղլուն նշել է, որ վերոնշյալ քաղաքացու հայցին լուրջ վերաբերվել պետք չէր, քանի որ Քոփթաշի և Քվանչի խոսքերի մեջ հանցանքի տարրեր չեն եղել: Ավելին, փաստաբանը դժգոհել է թուրքական արդարադատությունից` պնդելով, որ Դինքի գործով դատավարությունը ինչպես որ հարկն է, չի ընթացել:

Ermenihaber.am