Թուրքական դատարանում նիստին մեղադրյալները սև հանդերձանքով են ներկայացել` ի հիշատակ Հայոց ցեղասպանության զոհերի

Հասարակական11:49, 24 Ապրիլ 2013

Թուրքական դատարանում նիստին մեղադրյալները սև հանդերձանքով են ներկայացել` ի հիշատակ Հայոց ցեղասպանության զոհերի

Ստամբուլի ծանր հանցագործությունների 15-րդ դատարանում KCK-ի գործով այսօրվա դատական նիստին մեղադրյալների մեծ մասը դատարան է ներկայացել սև հանդերձանքով: Նշենք, որ KCK-ն «Քուրդիստանի համայնքների միություն»-ն է, որը համարվում է «Քուրդիստանի բանվորական կուսակցության» (ՔԲԿ-PKK) քաղաքացիական կառույցը:

Ըստ թուրքական «Սոնդաքիքա» լրատվական կայքի` սևազգեստ մեղադրյալներից մեկը` Էրթուշ Բոզքուրդ, ասել է, որ իրենց հանդերձանքը կապված է Հայոց ցեղասպանության տարելիցի հետ:

«Այսօր ապրիլի 24-ն է: Հայկական ջարդերի տարելիցը: Մենք կիսում ենք նրանց ցավը»,-ասել է նա:

Նշենք, որ «Քուրդիստանի համայնքների միությունը» (Koma Civakên Kurdistan) հիմնադրվել է 2005 թվականին «ՔԲԿ»-ի առաջնորդ Աբդուլլահ Օջալանի կարգադրությամբ: Թուրքիայում արգելված կազմակերպությունների շարքում է:

Ermenihaber.am