Ցուցարարները Գեզի զբոսայգու փողոցներից մեկը Հրանտ Դինքի անունով են կոչել

Հասարակական14:51, 06 Հունիս 2013

Ցուցարարները Գեզի զբոսայգու փողոցներից մեկը Հրանտ Դինքի անունով են կոչել

Թուրքական «Բիանեթ» էլեկտրոնային թերթի հաղորդմամբ` Թուրքիայի Հեղափոխական սոցիալիստական բանվորական կուսակցության անդամները «Բոլորս Հրանտ ենք, բոլորս հայ ենք» կարգախոսների ուղեկցությամբ Գեզի զբոսայգու փողոցներից մեկն անվանել են Թուրքիայում հրատարակվող «Ակօս» հայկական օրաթերթի հանգուցյալ խմբագրապետ Հրանտ Դինքի անունով:

Ակտիվիստների խումբը` ձեռքերում պահած «Այստեղ ենք ախպարիգ» գրությամբ ցուցանակներ, պահանջել է պատժել Դինքին սպանողներին:

Միաժամանակ Հրանտ Դինքի անունով անվանակոչված փողոցում «Նոր զարթոնք» հայկական նախաձեռնության կողմից վրանների դիմաց Սուրբ Հակոբ հայկական գերեզմանատան խորհրդանշական մակետն է տեղադրվել:

«Գերեզմանատունը» թվագրված 1551-1939 թվականներով, իսկ վրան գրված է հետևյալ գրությունը. «Մեր գերեզմանատունը վերցրեցիք, այգին չեք կարող վերցնել»:

Հայկական Սուրբ Հակոբ գերեզմանատունը հիմնադրվել էր Օսմանյան Սուլեյման Կանունի սուլթանի թույլտվությամբ` ի նշան երախտագիտության իր կյանքը փրկած հայ խոհարար Մանուկ Քարասեֆերյանին: Սուրբ Հակոբ գերեզմանատունը պետության ձեռքն է անցել և ոչնչացվել է հանրապետական Թուրքիայի ժամանակաշրջանում: Այսօր գերեզմանոցի տարածքում է գտնվում թուրքական «TRT» հեռուստաընկերության ստամբուլյան շենքը, «Hyatt Regency» և «Divan» հյուրանոցների շենքերը:

Ermenihaber.am