Թաքսիմի համերաշխության պլատֆորմը հետքայլ է արել

Հասարակական07:31, 11 Հունիս 2013

Թաքսիմի համերաշխության պլատֆորմը հետքայլ է արել

Թուրքական «Թուրքիյե գազեթեսի» լրատվական կայքը հայտնում է, որ Թաքսիմի համերաշխության պլատֆորմը, որը նախորդ շաբաթ կառավարությունից պահանջում էր 3-րդ կամուրջ և 3-րդ օդանավակայան չկառուցել, մեղմացրել է իր դիրքորոշումը: Հունիսի 10-ին պլատֆորմը մամուլի ասուլիսում հայտարարել է 3 պահանջների մասին, որոնք նախկինում 7-ն էին:

1 . Գեզի զբոսայգին պետք է շարունակի մնալ որպես այգի:
«Զբոսայգում թեկուզ մեկ ծառ անգամ չպետք է կտրվի: Աշխատանքային վայրի, կամ որևէ այլ բանի կառուցման նախագծումներ չպետք է կատարվի»:

2. Թաքսիմում ստորգետնյա թունել չպետք է կառուցել:

3. Ոստիկանության կողմից օրենքի սահմաններից դուրս ուժի կիրառման պատասխանատուների նկատմամբ հետաքննություն պետք է սկսվի:

Հիշեցնենք, որ մայիսի 28-ից Թուրքիայում սկսված զանգվածային բողոքի ցույցերի պատճառն իշխանությունների քաղաքաշինական նոր ծրագիրն է, ըստ որի, Ստամբուլի կենտրոնական Գեզի զբոսայգու մեծ մասը պետք է ոչնչացվեր, իսկ ծառերը` հատվեին: Զբոսայգու ոչնչացմանն ու ծառահատմանն ընդդիմացած ցուցարարների դեմ թուրքական ոստիկանությունը բիրտ ուժ է կիրառել` օգտագործելով արտասվաբեր գազ, ջրցան մեքենաներ, պլաստիկ փամփուշտներ և հատուկջոկատայիններ: Հետևանքը եղավ այն, որ բնապահպանական բնույթի ցույցերն աստիճանաբար վերածվեցին հակառավարական ակցիաների և ընդգրկեցին Թուրքիայի տասնյակ քաղաքներ: Վերջին տվյալների համաձայն` կան հարյուրավոր ձերբակալվածներ, վիրավորներ և 4 զոհ:

Ermenihaber.am