Թաքսիմի հրապարակը ոստիկանների հսկողության տակ է անցել

Հասարակական06:28, 11 Հունիս 2013

Թաքսիմի հրապարակը ոստիկանների հսկողության տակ է անցել

Ստամբուլի ոստիկանական ուժերը մտել են Թաքսիմի հրապարակ: Ոստիկանությունը նախօրոք տեղյակ էր պահել լրատվամիջոցներին, որ Գյումյուշսույի և Հարբիեի կողմից մուտք են գործելու Թաքսիմի հրապարակ, իսկ Գեզի զբոսայգու ուղղությամբ որևէ գործողություն չի իրականացվելու:

Ոստիկանները Թաքսիմի հրապարակում հավաքված ցուցարարների վրա կրակել են պլաստմասե փամփուշտներով և արցունքաբեր գազ են լցրել: Իսկ ցուցարարների արգելապատնեշի հետևից քարեր են նետել ոստիկանների ուղղությամբ:

«Թուրքիյե գազեթեսի» լրատվական կայքը տեղեկացնում է, որ ոստիկանական ստորաբաժանումները Թաքսիմի հրապարակում գտնվող ցուցարարների խմբերին նախազգուշացրել են. «Քաշվե´ք դեպի Գեզի զբոսայգի, ձեր ցույցերը և միջոցառումները այնտեղ շարունակե´ք»:

Աթաթուրքի անվան մշակույթի կենտրոնի (AKM) վրա փակցված պաստառները հանվել են` թողնելով միայն Աթաթուրքի նկարը և Թուրքիայի դրոշը: Շենքի վերին հարկերում տեղակայվել են ոստիկանական ուժերը:

Նշվում է նաև , որ առաջին անգամ ոստիկանությունը արցունքաբեր գազ կիրառելու համար ներողություն է խնդրել:

Հիշեցնենք, որ մայիսի 28-ից Թուրքիայում սկսված զանգվածային բողոքի ցույցերի պատճառն իշխանությունների քաղաքաշինական նոր ծրագիրն է, ըստ որի, Ստամբուլի կենտրոնական Գեզի զբոսայգու մեծ մասը պետք է ոչնչացվեր, իսկ ծառերը` հատվեին: Զբոսայգու ոչնչացմանն ու ծառահատմանն ընդդիմացած ցուցարարների դեմ թուրքական ոստիկանությունը բիրտ ուժ է կիրառել` օգտագործելով արտասվաբեր գազ, ջրցան մեքենաներ, պլաստիկ փամփուշտներ և հատուկջոկատայիններ: Հետևանքը եղավ այն, որ բնապահպանական բնույթի ցույցերն աստիճանաբար վերածվեցին հակառավարական ակցիաների և ընդգրկեցին Թուրքիայի տասնյակ քաղաքներ: Վերջին տվյալների համաձայն` կան հարյուրավոր ձերբակալվածներ, վիրավորներ և 4 զոհ: