Հայկական սիգարետները մաքսանենգ ճանապարհով էին հայտնվել Թուրքիայում

Հասարակական15:58, 14 Հունիս 2013

Հայկական սիգարետները մաքսանենգ ճանապարհով էին հայտնվել Թուրքիայում

Թուրքական «Աքշամ» ելեկտրոնային լրատվականը գրում է, որ Թուրքիայի` Սև ծովի մերձակայքում գտնվող Բոլու գավառի ժանդարմերիայի հրամանատարության կողմից առգրավվել է մաքսանենգ ճանապարհով սահմանն անցկացրած հայկական արտադրության 1950 տուփ սիգարետ:

Թերթի ներկայացմամբ` ժանդարմերիայի հրամանատարությունը դատարանից ստացած խուզարկության թույլտվության հիման վրա կանգնեցրել է հայկական տուրիստական ավտոբուսը և խուզարկության արդյունքում Ստամբուլ մեկնող Հայաստանի քաղաքացի Ռ.Մ.-ին պատկանող ուղեբեռի մեջ հայտնաբերել մաքսանենգ ճանապարհով Թուրքիայի սահմմանն անցկացրած 1950 տուփ հայկական արտադրության սիգարետ: Թերթն ուշադրություն է հրավիրել այն հանգամանքի վրա, որ հայտնաբերված սիգարետներից 1760 տուփը եղել է «Ախթամար» տեսակի:

Թերթը գրում է, որ Հայաստանի քաղաքացի Ռ.Մ.-ն երկրի սահմաններից արտաքսելու նպատակով հանձնվել է Բոլուի ոստիկանության օտարերկրացիների բաժանմուք:

Ermenihaber.am