Էրդողանը ոստիկանների միջոցով «գրավեց» Գեզին

Հասարակական06:52, 17 Հունիս 2013

Էրդողանը ոստիկանների միջոցով «գրավեց» Գեզին

Թուրքական «Միլլիյեթ» թերթը տեղեկացնում է, որ Գեզի զբոսայգում հավաքված ցուցարարներին ոստիկանությունը ցրել է: Անկարայում հունիսի 15-ին իր աջակիցների հետ ցույցի ժամանակ դիմելով Գեզի զբոսայգու ցուցարարներին` Էրդողանն ասել է. «Վաղը Ստամբուլում ցույց ենք անցկացնելու, եթե այգին չդատարկեք, ապա անվտանգության ուժերը գիտեն` ինչպես դատարկել»: Այս հայտարարությունից հետո ոստիկանությունը Գեզի զբոսայգու ցուցարարներին կոչ արեց ցրվել: Սակայն ոստիկանության նախազգուշացումներին ցուցարարները պատասխանեցին վանկարկումներով, որից հետո էլ անվտանգության ուժերը անցան հարձակման: Ոստիկանությունն ամբողջությամբ իր հսկողության տակ վերցրեց Թաքսիմ հրապարակը, Գեզի զբոսայգին, որոնք այժմ փակ են քաղաքացիների համար: Գեզին «գրավելուց» հետո այնտեղից սկսել են հեռացնել ցուցարարների վրանները, նրանց կողմից ստեղծված բարիկադները:

Թուրքական «Բուգյուն» լրատվական կայքի փոխանցմամբ` Գեզի զբոսայգու ցուցարարների ցրելու ժամանակ իրադարձություններին հետևող որոշ լրատվամիջոցների լրագրողներ են ձերբակալվել: Երեկոյան Օսմանբեյ փողոցում գտնվող Ռամադան հյուրանոցում վիրավորներին օգնություն ցույց տվող բժիշկները նույնպես ձերբակալվել են: Անկարայում ԱՄՆ դեսպանատան առջև հավաքված Գեզի զբոսայգու ցույցերի աջակիցների և ոստիականության միջև բախումներ են տեղի ունեցել, որի հետևանքով ձերբակալվել է ևս 105 ակտիվիստ:

Ermenihaber.am