«Ankakh.com»-ի տեղեկացմամբ` «BBC Türkçe»-ն զրուցել Թաքսիմի «Գեզի» զբոսայգու համար կազմակերպված ցույցերի առաջին իսկ օրերից լայնորեն հայտնի դարձած լուսանկարի սևազգեստ աղջկա հետ, ով դարձավ բազմահազարանոց ցույցերի յուրօրինակ խորհրդանիշը: Լուսանկարում նա ձեռքերը պարզած կանգնած է ջրցան մեքենայի առաջ և իր վրա է ընդունում ջրաշիթի հարվածը: Այդ աղջիկն ավստրալուհի Քեյթ Մուլենն է: Նա սովորում է Սիդնեյի համալսարանի սոցիոլոգիայի ֆակուլտետում, Թուրքիա է եկել ուսանողական փոխանակման ծրագրի շրջանակներում:

Քեյթը պատմել է իր և ցույցերին մասնակցելու սովորության մասին, ինչպես Թուրքիայում, այնպես էլ հայրենի Ավստրալիայում: Օրինակ՝ նրանք բողոքի ակցիա են կազմակերպել երկրում փախստականների նկատմամբ վատ վերաբերմունքի դեմ, քանի որ Ավստրալիա եկած փախստականներին իսկույն ձերբակալում են: Մեկ այլ ցույցի ժամանակ էլ բողոքում էին Իրաքի պատերազմի դեմ:

Հետաքրքիր է, որ Քեյթը, տեսնելով ջրցան մեքենաներին և մոտակայքում կանգնած լուսանկարիչներին, հատուկ է կանգնել մեքենայի դիմաց և իր վրա ընդունել ջրաշթի հարվածը, որպեսզի ֆոտոխցիկները ֆիքսեն այդ պահը: Այն մասին, թե իր լուսանկարը դարձել է «Գեզիի» ցուցարարների խորհրդանիշը, Քեյթը նշել է. «Այդ լուսանկարն արդեն իմը չէ, ինձ հետ կապ չունի: Եթե ավելի գլոբալ մտածենք, իմ ցույցը ոչինչ է այն հազարարվոր խիզախ ցուցարարների արածների համեմատությամբ: Սև զգեստով աղջիկն արդեն ես չեմ: Այդ աղջիկը հակակապիտալիստ մուսուլմանն է, կաթսաների և թավաների ձայն հանող գլխաշորով տարեց կինն է և իր համուզմունքների համար ոտքի կանգնած ու փողոց դուրս եկած յուրաքանչյուրը»: