Թուրքիայում ոտնահարվում է մարդկանց` տեղեկացված լինելու իրավունքը

Հասարակական10:27, 08 Հուլիս 2013

Թուրքիայում ոտնահարվում է մարդկանց` տեղեկացված լինելու իրավունքը

«Թուրքիայի լրագրողների միությունը» (ԹԼՄ-TGS) բողոքի ակցիա է կազմակերպել Ստամբուլի արդարադատության պալատի առջև: Ցուցարարաները պարզել են «Ազատեք կալանավորված լրագրողներին» գրությամբ ցուցապաստառ և վանկարկել «Ազատ մամուլին լռեցնել չի լինի», «իշխող կուսակցություն, ձեռքդ քաշի մեդիայից» կարգախոսներ:

Ըստ «Հյուրրիյեթ» օրաթերթի` բողոքի պատճառ է հանդիսացել նաև այն, որ հուլիսի 6-ին Թաքսիմ հրապարակի մոտ ոստիկանները խոչընդոտել են լրագրողների աշխատանքը: Լրագրողական համայնքը Ստամբուլի արդարադատության պալատի մոտ մամուլի հաղորդագրություն է տարածել, որին աջակցություն է հայտնել ընդդիմադիր «Ժողովրդահանրապետական կուսակցության» պատգամավոր Մելդա Օնուրը:

«Թուրքիայի լրագրողների միության» Ստամբուլի գրասենյակի ղեկավար Գյոքհան Դուրմուշը միության անունից ընթերցել է մամուլի հաղորդագրությունը` մասնավորապես ասելով. «Թուրքիայում լրագրողները մարմանական վնասվածքներ են ստանում, ստորացվում են, խոչընդոտում են նրանց կատարել իրենց աշխատանքը: Հարձակում են գործում ԶԼՄ-ների աշխատակիցների վրա, այսինքն հարձակման է ենթարկվում քաղաքացիների տեղեկացված լինելու իրավունքը»:

Ermenihaber.am