Թուրքիաբնակ հայերը իշխանություններից պահանջում են իրենց կոդավորելու ցուցակը

Հասարակական08:57, 13 Օգոստոս 2013

Թուրքիաբնակ հայերը իշխանություններից պահանջում են իրենց կոդավորելու ցուցակը

Այն բանից հետո, երբ հայտնի դարձավ, որ թուրքական իշխանությունները կոդավորում են ազգային փոքրամասնությունների ներկայացուցիչներին, Թուրքիայի ազգությամբ հայ քաղաքացիները դիմել են պետական պատկան մարմիններին` հայ համայնքի թվի մասին ստույգ տեղեկություններ ստանալու պահանջով:

Այդ մասին թուրքական «Թարաֆ» թերթին հայտնել է թուրքահայության հիմնադրամների խորհրդի նախագահ Նազարեթ Օզսահակյանը: Որպես անհրաժեշտություն` նշվել է այն հանգամանքը, որ շուտով ներհամայնքային ընտրություններ են լինելու և համայնքի ստույգ թվի իմացության կարիք կա:

Հայ համայնքի անունից դիմումն արդեն հանձնվել է բնակչության և քաղաքացիության հարցերով Ստամբուլի նահանգային վարչություն: Օզսահակյանը նշել է նաև, որ պետության կողմից տրվելիք հայ համայնքի անդամների ցուցակը կարևոր է նրանց տարիքային խմբերի կազմը որոշելու, ընտանեկան կարգավիճակը պարզելու և մի շարք այլ հարցերի համար:

Հիշեցնենք, որ բացահայտումից հետո պարզ էր դարձել, որ հույները Թուրքիայում ծածկագրված են 1, հայերը` 2, իսկ հրեաները` 3 կոդերով:

Ermenihaber.am