Թուրք հոդվածագիր. «Եկել է հաշվետու լինելու և առերեսվելու ժամանակը»

Հասարակական12:24, 27 Սեպտեմբեր 2013

Թուրք հոդվածագիր. «Եկել է հաշվետու լինելու և առերեսվելու ժամանակը»

Թուրքիայում Հայոց ցեղասպանության մասին հերթական հոդվածն է լույս տեսել: Սյունակագիր Օրալ Չալըշլարի`«Տիգրիս գետում մոմեր և լերկ ժայռեր» վերտառությամբ հոդվածում 1915 թվականի Հայոց ցեղասպանության մասին դրվագներ են ներկայացվում: Հոդվածում առանձին հատվածներ կան Հայոց ցեղասպանության օրերին Դիարբեքիրում զոհված 635 հայերի մասին պատմությունից: Չալըշլարը պատմում է, թե ինչպես է Արա Սարաֆյանը ապրիլի 24-ին այցելում Տիգրիս գետի վրա կառուցված 10 աչքանի կամուրջ, որը ցեղասպանության օրերին հայերի համար դարձել է իսկական ահուսարսափ: Հենց այս կամուրջից ցեղասպանության զոհ դարձած դիարբեքրիցի հայերը բռնել են մահվան ճամփան: Ի հիշատակ զոհերի՝ Արա Սարաֆյանը ծաղիկներ է իջեցրել գետը:

Հոդվածագիրը նկատում է, որ այդ սարսափելի օրերն արդեն անցյալում են, և կարծես թե եկել է հաշվետու լինելու և առերեսվելու ժամանակը: Քաղաքը աստիճանաբար գտնում է իր ինքնությունը: Հեղինակը հիշատակում է քաղաքի վերակառուցված հայկական Սուրբ Կիրակոս եկեղեցին: Ոգևորված նշում է, որ եկեղեցու հարևանությամբ գնտվող փողոցը անվանակոչվել է գրող Մկրտիչ Մարկոսյանի անունով: Հոդվածում պատմություններ կան նաև Դիարբեքիրի կրոնափոխ եղած հայերի մասին: Ըստ հեղինակի՝ քաղաքում աստիճանաբար վերականգնվում է հայկական ներկայությունը: Թուրքական «Ռադիքալ» օրաթերթում լույս տեսած հոդվածում նշվում է, որ Դիարբեքիրում գործում է խմբակ, որտեղ հայոց լեզվի դասընթացներ են անցկացվում: Դասընթացների մասնակիցների թիվը առայժմ 65 է:

Ermenihaber.am