Հասան Ջեմալը խոսել է Էրդողանի ներկայացրած փաթեթի բացթողումների մասին

Հասարակական08:12, 01 Հոկտեմբեր 2013

Հասան Ջեմալը խոսել է Էրդողանի ներկայացրած փաթեթի բացթողումների մասին

Թուրք հայտնի լրագրող Հասան Ջեմալը Թուրքիայում հրապարակված ժողովրդավարացման փաթեթի բովանդակությունը ընդհանուր առմամբ դրական է գնահատել:
Ջեմալը իր հոդվածում, որը հրապարակվել է թուրքական «TV 24» լրատվական կայքում, գրում է, որ փաթեթում տեղ գտած դրույթները կյանքի կոչելու հարցերն օրակարգային են դառնալու: Ինչպես նաև Թուրքիայի յուրահատկություններից ելնելով՝ շատ խդնիրներ պետք է ուշադրության արժանանան:

Հասան Ջեմալը առաջ է քաշում մի շարք հարցեր, որոնք վերաբերում են բովանդակությունը գործի վերածելուն: «Օրենքի կարգավորումները ի՞նչ ժամանակային կտրվածքով, ինչպե՞ս են կատարվելու և ի՞նչ բովանդակություն են ունենալու»,- գրել է Ջեմալը՝ ընդգծելով, որ այս հարցերը ոչ միայն օրենքների կարգավորմանն, այլև դրանց կիրառմանն է վերաբերում:

Հոդվածագիրը նշում է, որ սրանք առաջնային հարցեր են, որոնք պատասխան են պահանջում, քանի որ անցյալում էլ Թուրքիայում ժողովրդավարացման խոստումներ են տրվել:

Ջեմալը ժողովրդավարացման փաթեթում քրդական հարցին առնչվող կետրը դրական է գնահատում՝ առանձնացնելով հետևյալ կետերը.
«1. Հատուկ դպրոցներում, կրթական հաստատություններում քրդերենի ուսուցման կազմակերպում:
2. Նախակրթարաններում դասերը չեն սկսվի «Թուրք եմ, իրավացի եմ» արտահայտությամբ:

3. W, Q, X տառերի ընդգրկումը այբուբենի մեջ:

4. Գյուղերը, շրջանները և նահանգները քրդական անուններով կոչելու իրավասություն է տրվելու:

5.Ընտրական համակարգում և քաղաքական կուսակցությունների մասին օրենքում փոփոխություններ պետք է կատարվեն:

Քրդական հարցի լուծումը խաղաղ ճանապարհի վրա դնելու հարցում այս բոլորը շատ դրական են: Սակայն, քրդական «Խաղաղություն և ժողովրդավարության» կուսակցության պատգամավոր Հասիփ Քափլանի բարձրացրած հարցը նույնպես պետք է հաշվի առնել: Պատգամավորը հետևյալ հարցն է ուղղել. «Ժողովրդին չի բավարարի մայրենի լեզուն հատուկ դպրոցներում սովորելու որոշումը: Վարչապետ Էրդողանը իր մայրենի լեզուն վճարովի հատուկ դպրոցո՞ւմ է սովորել»: Մյուս կողմից էլ փաթեթում ահաբեկչության դեմ պայքարի մասին օրենքի վերաբերյալ որևէ խոսք չկա: Իսկ այն և՛ քուրդ բանտարկյալների, և՛ խոսքի ազատության համար ձերբակալված լրագրողների տեսանկյունից ամբողջովին փոփոխության պետք է ենթարկվի: Փաթեթում քրդական հարցին վերաբերող մեկ մեծ բացթողում ևս կա, այն վերաբերում է տեղական կառավարման հարցին, որն ընդհանրապես չի ընդգրկվել փաթեթի մեջ»,- գրում է Ջեմալը:
Հոդվածի վերջում Ջեմալը, մեջբերելով ժողավրդավարացման փաթեթի դրույթների հրապարակումից հետո տարածված ասացվածքը, գրել է . «Ո՛չ, սարը մուկ չի ծնել, բայց…
Հենց այս «բայցին» պետք է շարունակել դիմակայել»: