Բուրհան Քուզու. «Մայրենի լեզվով ուսուցումը կխաթարի Թուրքիայի ներքին անդորրը»

Հասարակական11:38, 03 Հոկտեմբեր 2013

Բուրհան Քուզու. «Մայրենի լեզվով ուսուցումը կխաթարի Թուրքիայի ներքին անդորրը»

«Արդարություն և զարգացում» կուսակցության (ԱԶԿ-AKP) անդամ Բուրհան Քուզուն մասնակցել է թուրքական «Trt türk» հեռուստաընկերության եթերով հեռարձակվող «Տարակարծություն» հաղորդմանը: Նա անդրադարձել է Թուրքիայում մայրենի լեզվով ուսուցում կազմակերպելու խնդրին: Քուզուն մասնավորապես ասել է. «Եթե ինձ հարցնեն, ապա կասեմ մայրենի լեզվով ուսուցման կազմակերպումը ճիշտ չի լինի: Ավելին, մայրենի լեզվով ուսուցման կազմակերպումը կխափանի երկրի ներքին հանգստությունը: Եթե բաժանվելը լավ բան է, եկեք բաժանվենք: Թուրքիայում 18 էթնիկ խումբ կա: Այս երկրում այդքան գիրք տպագրելը, այդքան ուսուցիչների պատրաստումը մի՞թե չի խաթարի երկրի ներքին անդորրը: Բոլոր դպրոցներում քրդերենի ուսուցումը պարտադիր առարկաների շարքում ընդգրկեք, համալսարան հիմնեք, տեսե՛ք, թե հարցը ուր կգնա»:

Թուրքական «հաբեր.գազեթեվաթան» լրատվական կայքն անդրադարձել է վերոնշյալ հաղորդմանը՝ մեջբերումներ անելով Բուրհան Քուզուի խոսքերից:Հաղորդման ժամանակ Քուզուն նշել է, որ մայրենի լեզվով ուսուցանում կազմակերպելու մասին «Արդարություն և զարգացում» կուսակցության անդամները այլ կարծիք ունեն: Նա մի քանի օրինակներ է բերել ԱՄՆ-ի և Բելգիայի կրթական համակարգից, որտեղ նույնպես կրթությունը անցկացվում է մայրենի լեզվով, և նշել դրանց բացասական հետևանքների մասին:Նրա խոսքերով, խնդիրը չի սահմանափակվում միայն քրդական գործոնով, քանի որ երկրում կա 18 էթնիկ խումբ:

Ermenihaber.am