Էրդողանի բարեփոխումների փաթեթը նախատեսում է բնակավայրերի անվանափոխություն

Հասարակական13:26, 04 Հոկտեմբեր 2013

Էրդողանի բարեփոխումների փաթեթը նախատեսում է բնակավայրերի անվանափոխություն

Թուրքական կառավարության կազմած բարեփոխումների «ժողովրդավարացման փաթեթը», որը սեպտեմբերի 30-ին հանրությանն էր ներկայացրել վարչապետ Ռեջեփ Թայիփ Էրդողանը, ի թիվս այլ հարցերի, ներառում է նաև տեղանունների վերանվանման մասին հարցը: Նախատեսվում է գաղափարախոսական ազդեցությամբ ժամանակին անվանափոխված գյուղերը, քաղաքները և նահանգները վերանվանել նախկին անուններով:

Ըստ թուրքական «Հաբերլեր» լրատվական կայքի` փաթեթի այս կետը Թուրքիայի որոշ տեղերում խուճապ, որոշ տեղերում հրճվանք է առաջացրել:

Ընդ որում անվանափոխությունը չի սահմանափակվում միայն հունական, հայկական կամ քրդական ծագման տեղանուններով, ըստ փաթեթի, վերանվանման հնարավորություն է տրվելու նաև այն վայրերին, որոնք ունեցել են Թուրքիայի պատմության հետ առնչվող անուններ:

Կան բնակավայրեր, որոնց բնակիչները պահանջում են քվեարկությամբ լուծել վերանվանման հարցը, կան բնակավայրեր, որոնց բնակիչներն ընդհանրապես նոր անուն են ուզում տալ իրենց բնակավայրին: Եվ կա երեք նահանգ, որոնց բնակիչները, ըստ նշյալ լրատվական կայքի, հպարտանում են ձևափոխման ենթարկված անվանումներով: Խոսքը Մարաշ, Այնթափ և Ուրֆա հայկական պատմական տեղանունների մասին է, որոնք ներկայիս Թուրքիայում ձևախեղվել են Քահրամանմարաշի (Հհերոս Մարաշ), Գազիայնթափի (հաղթող Այնթափ) և Շանլըուրֆայի (փառապանծ Ուրֆա):

Ermenihaber.am