Թուրքիայում հերթական անգամ հայկական գերեզմանոցի վրա դպրոց են կառուցում

Հասարակական08:40, 07 Հոկտեմբեր 2013

Թուրքիայում հերթական անգամ հայկական գերեզմանոցի վրա դպրոց են կառուցում

Ներկայիս Թուրքիայի Շանլըուրֆա (Եդեսիա) շրջանի օնբիրինսան (Ալիգյոր) ավանում հայկական գերեզմանատան վրա կառուցվում է տարրական դպրոց: Շինարարական աշխատանքների ժամանակ հողի երես են դուրս եկել մարդկային գանգերի և կմախքոսկրերի կտորներ: Բնակիչները հավաքել են այդ ոսկորները և ավելի հեռու վայրում ամփոփել հողի մեջ: Շանլըուրֆայի տեղական լրատվական կայքը հայտնում է, որ բնակիչները դժգոհում են դպրոցի կառուցման վայրի սխալ ընտրությունից:

Բնակիչներից մեկը` Իբրահիմ Թեքչեն, լրագրողին պատմել է, որ իր ծնողների գերեզմանը ևս վնասվել է ու հանգուցյալների մասունքներն ինքը ստիպված է եղել տեղափոխել ու թաղել նոր գերեզմանում:

«Մեր պապերն ասում էին, որ այստեղ հայկական գերեզմանատուն է եղել: Բայց դա կապ չունի, ինչ դավանանք ու կրոն էլ լինի, ով և ովքեր էլ եղած լինեն, մեկ է, պատմությունը մնում է պատմություն: Տրակտորի ամեն հարվածից նոր ոսկորներ են դուրս գալիս հողի երես: Անպատիվ գործ է գերեզմանի վրա դպրոց կառուցելը: Պատկան մարմիններին կոչ ենք անում գործի անցնել»,- պատմել է Իբրահիմ Թեքչեն:

Հիշեցնենք, որ նմանատիպ դեպք եղել է նաև Վանի Գևաշ գյուղում, երբ հայերի գերեզմանների վրա կառուցել են դպրոց:

Ermenihaber.am