Ադեմ Յավուզ. «Թուրքիայի դեմ կոնկրետ օպերացիա է մշակվում»

Հասարակական08:58, 25 Հոկտեմբեր 2013

Ադեմ Յավուզ. «Թուրքիայի դեմ կոնկրետ օպերացիա է մշակվում»

Աշխարհի տարբեր երկրներում տարբեր առիթներով Թուրքիայի դեմ սփյուռքահայերի կազմակերպած բողոքի ակցիաները լուրջ հետևանքներ ու ազդեցություն են թողնում: Այս խնդրով մտահոգ թուրք սյունակագիր Ադեմ Յավուզ Արսլանը «Բուգյուն» թերթում հրապարակած իր հոդվածում տագնապալի է համարել վերոնշյալ իրողությունը:

Նա նկատել է տալիս, որ հայերի բողոքի ցույցերը գլխավորապես կապված են Թուրքիայի կողմից Ցեղասպանության ճանաչման, ներողության և հատուցման հետ: Յավուզը ուշադրություն է հրավիրում օրերս Լոս Անջելեսում գտնված տնտեսական հարցերով Թուրքիայի փոխվարչապետ Ալի Բաբաջանի դեմ հենց հյուրանոցի բակում հայերի կազմակերպած բողոքի միջոցառման վրա: Միջանկյալ նշենք, որ Ալի Բաբաջանին և թուրքական պատվիրակության մյուս անդամներին ստիպված են եղել հեռանալ ոչ թե գլխավոր մուտքով և խոհանոցի հետնադռներով:

Հոդվածագիրը նշում է, որ բողոքի ակցիայի ժամանակ ցուցարարները ի թիվս այլ պաստառների ունեցել են նաև հետևյալ գրությամբ պաստառ` «Թուրքիան աջակցում է Ալ Քաիդային»: Այս միտքը տեղ գտավ նաև ամերիկյան առաջատար պարբերականներում, որոնք սկսեցին Թուրքիայի վարչապետին, արտգործնախարարին և հետախուզության ղեկավարին մեղադրող հրապարակումներով հանդես գալ:

«Եվ եթե վաղը կամ մեկ այլ օր բողոքի ակցիաներում, լուրերում կամ նույնիսկ ֆիլմերում Թուրքիան և Ալ Քաիդան կողք կողքի տեսնենք, արդեն չպիտի զարմանանք»,- գրում է հոդվածագիրը և մտավախություն հայտնում, որ հիմա Թուրքիայի դեմ կոնկրետ օպերացիա է մշակվում: Ըստ նրա` միտում կա Թուրքիային «հրել բոլորովին այլ տեղ»:

Ermenihaber.am