Էրդողան. «Հայ քաղաքացիների իրավունքները պաշտպանելը մեր պարտականությունն է »

Հասարակական07:49, 28 Հոկտեմբեր 2013

Էրդողան. «Հայ քաղաքացիների իրավունքները պաշտպանելը մեր պարտականությունն է »

Թուրքիայի վարչապետ Ռեջեփ Թայիփ Էրդողանը պատասխանել է ընդդիմադիր «Ազգայնական շարժում» կուսակցության (ԱՇԿ-MHP) առաջնորդ Դևլեթ Բահչելիի քննադատություններին: Վերջինս ասել էր, որ վարչապետը մի կողմից ճանապարհ կառուցելու համար պատրաստ է մզկիթ քանդել, մյուս կողմից էլ ժողովրդի վճարած հարկերով Աղթամարի եկեղեցին է վերանորոգում:

Բահչելիին ուղղված խոսքում Վանում գտնվող Էրդողանը հարց է ուղղել, թե արդյո՞ք այս երկրում ուղղափառ հայ քաղաքացիներ չկան և նրանց իրավունքների պաշտպանությունը արդյո՞ք իրենց պարտականությունը չէ, և մի՞թե նրանք հարկ չեն վճարում: «Իհարկե կան, և հարկեր էլ վճարում են: Նրանց իրավունքների պաշտպանությունը նաև ձեր պարտականությունն է: Իսկ ես այս անում եմ և՛ իսլամի, և՛ մարդկային, և՛ խղճի, և՛ օրենքի թելադրանքով: Այս գործը անփորձները չեն կարող անել»,- Էրդողանի խոսքերը մեջբերում է թուրքական «Հյուրրիյեթ» թերթը:

Հիշեցնենք, որ վերջերս կառավարությունը հաստատել էր նոր ճանապարհի շինարարության նախագիծը, որն անցնելու էր անտառի միջով: Որոշման դեմ սկսված բողոքներին ի պատասխան՝ Էրդողանը հայտարարել էր, որ եթե անգամ ճանապարհին մզկիթ էլ լինի, այն կքանդի և ուրիշ տեղ նորը կկառուցի: