Ստամբուլի Բաքըրքյոյ վարչական շրջանի ղեկավարի թեկնածուն այցելել է Կ.Պոլսի Հայոց պատրիարքարան

Հասարակական07:50, 23 Նոյեմբեր 2013

Ստամբուլի Բաքըրքյոյ վարչական շրջանի ղեկավարի թեկնածուն այցելել է Կ.Պոլսի Հայոց պատրիարքարան

Ստամբուլի Բաքըրքյոյ վարչական շրջանի ղեկավարի թեկնածու Օղուլ Աքթունան այցելել է Կ.Պոլսի Հայոց պատրիարքարան: Նրան ընդունել է պատրիարքական ընդհանուր փոխանորդ Արամ արք. Աթեշյանը:

Թուրքական «Գերչեք գյունդեմ» լրատվական կայքը հայտնում է, որ Աքթունան հետաքրքրվել է հայ համայնքի խնդիրներով:

Արամ արք. Աթեշյանը հայտնել է, որ Թուրքիայում 70 հազար հայ քաղաքացի է ապրում՝ նշելով, որ նրանցից շուրջ 20 հազարը բնակվում է հենց Բաքըրքյոյում:

«Մեզ ուրախացնում է այն հանգամանքը, որ դուք հետաքրքրվում եք Ձեր թաղամասում բնակվող հայերի խնդիրներով», - ընդգծել է արքեպիսկոպոսը:

Աթեշյանը հիշեցրել է, որ դարեր շարունակ հայերը ապրել են այդ տարածքներում. «Սուլթան Մեհմեթ Երկրորդ Ստամբուլը գրավելուց հետո հայոց պատրիարքությունը Ստամբուլ կանչեց»:

Աքթունան էլ իր հերթին նշեց, որ շրջել է Բաքըրքոյը փողոց առ փողոց և տեղյակ է, որ հայերը խնդիրներ ունեն:

«Այդ խնդիրները միասին կլուծենք: Բաքըրքյոյի բնակչության երջանկությունը նաև իմ երջանկությունն է: Մեր սկզբունքն է լինելու եղբայրաբար ապրել առանց որևէ խտրականության, առանց որևէ մեկին օտարելու»,- հայտնել է Բաքըրքյոյի ղեկավարի թեկնածուն: