«Հրանտի ընկերներ» նախաձեռնություն. ակցիա թուրքական դատարանի առաջ

Հասարակական12:39, 03 Դեկտեմբեր 2013

«Հրանտի ընկերներ» նախաձեռնություն. ակցիա թուրքական դատարանի առաջ

Այսօր Ստամբուլում «Հրանտ ընկերներ» կոչվող նախաձեռնությունը ակցիա է անցկացրել թուրքական դատարանի առջև, որտեղ ընթանում է «Ակօս» թերթի խմբագիր Հրանտ Դինքի սպանության գործով դատավարությունը:

Ակտիվիստները վանկարկել են` «Մարդասպան պետությունը պատասխան կտա», «Հանցագործին պաշտպանողը հանցագործության մասնակից է», «Հանուն Հրանտի, հանուն ազատության»:

Ըստ թուրքական «Սոնդաքիքա» լրատվական կայքի` ակցիայի մասնակիցներից դերասան և ռեժիսոր Միդյաթ Սերմիյանը հանդես գալով հայտարարությամբ,ասել է, որ հանցագործության մասնակից պետական պաշտոնյաները դատվելու փոխարեն պաշտոնի բարձրացումներ են ստացել:

«Իսկ Հրանտի հեղինակած հայտնի հոդվածում հանցագործության տարրեր գտած դատավորներն էլ սկսեցին բարձրանալ ծառայողական աստիճանով: Կարևոր պաշտոններ ստացան: Նրանցից ոմանք Հրանտի մասին ասեցին. « Թուրք լիներ, անմեղ կճանաչվեր: Նույնիսկ ես «Սերմիյան» ազգանվանս համար , շատ ժամանակ խնդիրներ եմ ունենում: Ազգանվանս «յան» ածանցը հանգիստ չի տալիս որոշ ռասիստների: Սակայն լինեմ հայ թե ասորի, ես միշտ կլինեմ Հրանտ Դինք»:

Հիշեցնենք, որ Հրանտ Դինքը սպանվել է 2007 թվականի հունվարի 19-ին Ստամբուլի կենտրոնում «Ակոս»ի խմբագրատանը կից տարածքում:

Ermenihaber.am